మూవీడెస్క్: యంగ్ టైగర్ ఎన్టీఆర్ అభిమానులు ఎంతో ఆసక్తిగా ఎదురుచూస్తున్న దేవర సినిమా సెప్టెంబర్ 27న విడుదలకు సిద్దమవుతోంది.
కొరటాల శివ దర్శకత్వంలో తెరకెక్కుతున్న ఈ సినిమాపై దేశవ్యాప్తంగా భారీ అంచనాలు ఉన్నాయి.
అనిరుద్ రవిచందర్ సంగీతం అందించిన పాటలు ఇప్పటికే ప్రేక్షకుల మనసులు దోచుకుని, సినిమాపై మరింత ఆసక్తిని పెంచాయి.
సినిమా విడుదల సమీపిస్తున్న నేపథ్యంలో దేవర టీం ప్రమోషన్ కార్యక్రమాలను ప్రారంభించేందుకు సిద్ధమవుతోంది.
ఇందులో భాగంగా సెప్టెంబర్ 10న ముంబైలో గ్రాండ్ ట్రైలర్ లాంచ్ ఈవెంట్ జరుగుతుంది. మంగళవారం సాయంత్రం 5 గంటలకు ట్రైలర్ రాబోతోంది.
హిందీలో బజ్ క్రియేట్ అవ్వాలి అంటే తప్పనిసరిగా ట్రైలర్ క్లిక్కవ్వాలి. కాబట్టి అందరి ఫోకస్ కూడా ట్రైలర్ పైనే ఉంది.
ఇక ఈ కార్యక్రమంలో ఎన్టీఆర్ తో పాటు, హీరోయిన్ జాన్వీ కపూర్, ప్రతినాయకుడిగా నటించిన సైఫ్ అలీ ఖాన్ కూడా పాల్గొనబోతున్నట్లు తెలుస్తోంది.
ఇక ట్రైలర్ 2 నిమిషాల 45 సెకన్ల నిడివితో ఉండబోతోంది. ట్రైలర్ లాంచ్ తోనే ప్రమోషన్స్ లో మరింత జోష్ రానుందని అంచనా.
ట్రైలర్ విడుదలతో ప్రేక్షకులు సినిమా పై మరింత ఉత్సాహంగా ఎదురుచూస్తారనే నమ్మకం వ్యక్తం అవుతోంది.
ఇదిలా ఉండగా, నార్త్ అమెరికాలో దేవర సినిమా అడ్వాన్స్ బుకింగ్స్ ఇప్పటికే ప్రారంభమై, వేగంగా టికెట్లు అమ్ముడవుతున్నాయి.