డిజిటల్ కార్పొరేషన్ స్కాం లో ప్రజాధనంతో సోషల్ మీడియా కార్యకర్తలకు జీతాలు ఇచ్చారని డీఐజీ కోయ ప్రవీణ్ వెల్లడి
అమరావతి: ఆంధ్రప్రదేశ్‌లో డిజిటల్ కార్పొరేషన్ వ్యవహారం సంచలనం సృష్టిస్తోంది. ముఖ్యంగా వైసీపీకి అనుకూలంగా సోషల్ మీడియాలో పోస్టులు పెట్టిన వారికి ప్రజాధనంతో జీతాలు ఇచ్చారని డీఐజీ కోయ ప్రవీణ్ ప్రెస్‌మీట్‌లో వెల్లడించారు. గత ఐదేళ్లలో సోషల్ మీడియా ద్వారా విపక్ష నేతలపై జుగుప్సాకరమైన పోస్టులు చేసిన అనేక మంది డిజిటల్ కార్పొరేషన్ నుంచి జీతాలు తీసుకున్నట్లు ఆధారాలు బయటపడటంతో, దీనిపై పెద్ద ఎత్తున దర్యాప్తు జరిగే అవకాశం ఉందని తెలుస్తోంది.
డిజిటల్ కార్పొరేషన్ పేరిట సమర్థవంతమైన ఉద్యోగం ఏమీ చేయకపోయినా, ముఖ్యంగా వైసీపీకి అనుకూలంగా సోషల్ మీడియాలో విరుచుకుపడిన వారికి, బూతులు తిట్టిన వారికి జీతాలు అందాయని కఠిన వాస్తవాలు వెలుగులోకి వచ్చాయి. వర్రా రవీందర్ రెడ్డి, ఇంటూరి రవికిరణ్ లాంటి బూతు పుంగవులు కూడా ఈ జాబితాలో ఉన్నట్లు తెలుస్తోంది. అంతేకాదు, వారు హైకోర్టు, సుప్రీంకోర్టు న్యాయమూర్తులపై కూడా తప్పుడు పోస్టులు పెట్టినట్లు గుర్తించారు.
ఈ వ్యవహారం ప్రస్తుతం పూర్తి స్థాయి దర్యాప్తు దిశగా సాగుతుండగా, ప్రభుత్వం కూడా ఇలాంటి వ్యవస్థీకృత నేరాల వెనుకున్న వారిని కఠినంగా శిక్షించాలని భావిస్తోంది. ఈ క్రమంలో, సజ్జల భార్గవ్ రెడ్డిని ఏ వన్‌గా పెట్టి కేసు నమోదు చేసినట్లు తెలుస్తోంది. వైసీపీకి అనుకూలంగా సోషల్ మీడియా కార్యకలాపాలు నిర్వహించినవారందరిపై విచారణ మరింత లోతుగా సాగుతుందని పోలీసు వర్గాలు పేర్కొంటున్నాయి.
ప్రజాధనాన్ని రాజకీయ ప్రయోజనాలకు వినియోగించి, ప్రజాస్వామ్య వ్యవస్థను దెబ్బతీసేలా సోషల్ మీడియా ద్వారా అసాంఘిక శక్తుల్లా వ్యవహరించారని ఆరోపణలు రావడంతో, ఈ కేసు రాష్ట్ర రాజకీయాల్లో మరింత చర్చనీయాంశంగా మారింది.