బిజినెస్: మంచి క్రెడిట్ స్కోర్‌ వల్ల బెనిఫిట్స్ ఏమిటో తెలుసా?
మంచి క్రెడిట్ స్కోర్‌ను కలిగి ఉండడం కేవలం ఆర్థిక లావాదేవీలకు మాత్రమే కాదు, జీవితంలో అనేక అవకాశాలకు ద్వారాలు తెరుస్తుంది. తక్కువ వడ్డీ రేట్లు, అధిక క్రెడిట్ లిమిట్లు, బీమా ప్రీమియం డిస్కౌంట్లు, ప్రీమియం క్రెడిట్ కార్డులు, మరియు BFSI (Banking, Financial Services, Insurance) రంగంలో ఉద్యోగ అవకాశాలు ఇవన్నీ మంచి క్రెడిట్ స్కోర్‌ వల్ల సాధ్యమే. ఎలానో తెలుసుకుందామా.. ?
తక్కువ వడ్డీకే లోన్స్
మంచి క్రెడిట్ స్కోర్‌తో ఉన్నవారికి బ్యాంకులు సులభంగా పర్సనల్ లోన్‌, హోమ్ లోన్‌, మరియు కార్ లోన్‌లను ఇస్తాయి. అంతేకాదు, వడ్డీ రేట్లలో 20bps-80bps (బేసిస్ పాయింట్స్) వరకు తగ్గింపునూ అందిస్తాయి. మీ ఆర్థిక చరిత్ర, రుణం తీర్చగలిగే సామర్థ్యం, మరియు ఆర్థిక స్థిరత్వం ఇవన్నీ బ్యాంకులు పరిశీలిస్తాయి.
ఇన్సూరెన్స్ ప్రీమియం డిస్కౌంట్లు
క్రెడిట్ స్కోర్‌ 800కు పైగా ఉంటే హోమ్, కార్, మరియు బైక్ ఇన్సూరెన్స్ ప్రీమియంలపై 5%-15% వరకు డిస్కౌంట్లు లభించవచ్చు. బ్యాంకులు మంచి క్రెడిట్ స్కోర్‌ ఉన్నవారిని తక్కువ రిస్క్‌ ఉన్నవారిగా పరిగణించి ఇలాంటి ప్రయోజనాలను అందిస్తాయి.
ప్రీమియం క్రెడిట్ కార్డులు
750-800 పాయింట్ల మధ్య క్రెడిట్ స్కోర్‌ ఉన్నవారికి బ్యాంకులు హయ్యర్ క్రెడిట్ లిమిట్లు, తక్కువ వడ్డీ రేట్లు, మరియు ప్రత్యేక రివార్డ్స్‌తో కూడిన ప్రీమియం క్రెడిట్ కార్డులను ఆఫర్‌ చేస్తాయి. ఇది మాత్రమే కాదు, కొత్త క్రెడిట్ కార్డులు పొందడంలో కూడా సౌలభ్యం ఉంటుంది.
BFSI రంగంలో ఉద్యోగ అవకాశాలు
బ్యాంకింగ్, ఫైనాన్షియల్ సర్వీసెస్, మరియు ఇన్సూరెన్స్ (BFSI) రంగాల్లో మంచి క్రెడిట్ స్కోర్‌ ఉన్నవారికి ప్రాధాన్యత ఇస్తున్నారు. అయితే, అభ్యర్థుల అనుమతితోనే కంపెనీలు వారి క్రెడిట్ స్కోర్‌ను పరిశీలిస్తాయి. మంచి క్రెడిట్ హిస్టరీ కలిగిన వ్యక్తులకు ఈ రంగంలో ఉద్యోగాలు దొరికే అవకాశాలు అధికంగా ఉంటాయి.
తప్పులు చేయకండి
క్రెడిట్ కార్డులు మరియు రుణాలు సకాలంలో చెల్లించకపోతే క్రెడిట్ స్కోర్‌ తగ్గిపోయే ప్రమాదం ఉంది. రుణం తీసుకున్నప్పుడు లేదా క్రెడిట్ కార్డును ఉపయోగించినప్పుడు, దాని పరిమితి 30%-40% వరకు మాత్రమే వినియోగించాలి. మీ బిల్లులను ఎప్పటికప్పుడు చెల్లించడం ద్వారా స్కోర్‌ మెరుగవుతుంది.
నోట్
ఈ సమాచారం కేవలం అవగాహన కోసం మాత్రమే. ఆర్థిక నిర్ణయాలు తీసుకునే ముందు వ్యక్తిగత ఆర్థిక నిపుణుల సలహా తీసుకోవడం అవసరం.