తెలంగాణ: సినిమాను విడుదలకు ముందే చంపొద్దు! – విశ్వక్‌ సేన్‌
విశ్వక్‌ సేన్‌ హీరోగా రామ్‌ నారాయణ్‌ దర్శకత్వంలో తెరకెక్కిన ‘లైలా’ సినిమా చుట్టూ వివాదాలు చెలరేగుతున్నాయి. ఈ చిత్రాన్ని బాయ్‌కాట్‌ చేయాలంటూ సోషల్‌ మీడియాలో జోరుగా ప్రచారం సాగుతోంది. ఈ నేపథ్యంలో, విశ్వక్‌ సేన్‌ ఎమోషనల్‌ అయ్యారు. తనపై వ్యక్తిగత కోపాన్ని సినిమా మీద చూపవద్దని, విడుదలకు ముందే దానిని చంపొద్దని విజ్ఞప్తి చేశారు.
ఈ సినిమా ఫిబ్రవరి 14న ప్రేక్షకుల ముందుకు రానుంది. అయితే, ఆదివారం జరిగిన ప్రీ-రిలీజ్‌ ఈవెంట్‌లో నటుడు పృథ్వీరాజ్ చేసిన కొన్ని వ్యాఖ్యలు పెను వివాదానికి దారితీశాయి. ఈ వ్యాఖ్యలు వైరల్‌ కావడంతో, సినిమా పై నెగటివ్‌ ప్రచారం ఊపందుకుంది. ఈ విషయంపై స్పందించిన విశ్వక్‌ సేన్‌ మీడియా సమావేశం నిర్వహించి వివరణ ఇచ్చారు.
‘‘ఎందుకు నేను బలి కావాలి?’’ – విశ్వక్‌ సేన్‌ అసహనం
ఈ వివాదంపై స్పందించిన విశ్వక్‌ సేన్‌, సినిమా ప్రమోషన్‌ కార్యక్రమాలపై పూర్తిగా దృష్టి పెట్టానని, కానీ అనూహ్యంగా ఈ నెగటివ్‌ ప్రచారం ఎదురవుతోందని ఆవేదన వ్యక్తం చేశారు. ‘‘ఇప్పటి వరకూ మా సినిమా ప్రచారం పాజిటివ్‌గానే సాగింది. ఈ సినిమా నాకెంతో ప్రత్యేకం. అందుకే వేరే చిత్రాల షూటింగ్‌ పనులు వాయిదా వేసి ప్రమోషన్‌ కార్యక్రమాల మీద దృష్టిపెట్టాను’’ అని తెలిపారు.
అయితే, ‘‘ఫిబ్రవరి 14న ఉదయమే ‘లైలా’ హెచ్‌డీ ప్రింట్‌ లింక్‌ పెడతామంటూ బెదిరింపులు వస్తున్నాయి. ‘వీడి ఖాతాలో ఇంకొకడు బలి పాపం’ అంటూ ట్రోలింగ్‌ చేస్తున్నారు. బాయ్‌కాట్‌ అంటూ 25 వేల ట్వీట్లు చేశారు. నేనెందుకు బలి కావాలి సర్‌? 100 మందిలో ఒకడు తప్పు చేస్తే 99 మందిని ఎలా తప్పుబడతాం? సినిమా వాళ్లం కాబట్టి తేలిగ్గా టార్గెట్‌ చేయాలనుకుంటారా?’’ అని ఆయన ప్రశ్నించారు.
మేము అక్కడే ఉండి ఉంటే’
పృథ్వీరాజ్ చేసిన వ్యాఖ్యలపై స్పందించిన విశ్వక్‌ సేన్‌.. ‘‘ఆయన మాట్లాడుతున్నప్పుడు నేను, నిర్మాత చిరంజీవిని ఆహ్వానించడానికి వెళ్లాం. ఆయన ఏం మాట్లాడారో ఇంటికి తిరిగి వచ్చిన తర్వాతనే మాకు తెలిసింది. మా సినిమా ఈవెంట్‌లో జరిగినందుకు మేము క్షమాపణ చెబుతున్నాం. కానీ, ఆయన మాటలతో మాకు ఎలాంటి సంబంధం లేదు’’ అని స్పష్టం చేశారు.
అంతేకాదు, ‘‘ఆయన వ్యాఖ్యలు అప్రయత్నంగా జరిగాయి. మేము అక్కడే ఉండి ఉంటే మైక్‌ లాగేసేవాళ్లం. కానీ, ఇలాంటి విషయాలకు మేము బాధ్యత వహించలేం. మా సినిమా మీద కోపం చూపించకండి. విడుదలకు ముందే సినిమాను చంపొద్దు’’ అని కోరారు.
‘సినిమా తీస్తే బాధ తెలుస్తుంది!
ఓ విలేకరి ‘‘ఇది కూడా ఓ రకమైన ప్రమోషనా?’’ అని ప్రశ్నించగా, విశ్వక్‌ సేన్‌ అసహనం వ్యక్తం చేశారు. ‘‘సినిమా తీసేందుకు కోట్లు ఖర్చు పెడతాం. మీరే ఓ సినిమా తీయండి, అప్పుడు తెలుస్తుంది ఆ బాధ’’ అంటూ ఘాటుగా స్పందించారు.
‘పైరసీని అడ్డుకునేందుకు కఠిన చర్యలు
ఇటీవలే విడుదలైన ‘తండేల్’ సినిమా పైరసీకి గురైన విషయాన్ని ప్రస్తావించిన విలేకరి, ‘‘లైలా సినిమా కూడా పైరసీకి గురైతే ఎలాంటి చర్యలు తీసుకుంటారు?’’ అని ప్రశ్నించగా, నిర్మాత సాహు గారపాటి స్పందించారు. ‘‘తండేల్ పైరసీ వ్యవహారంలో నిర్మాత అల్లు అరవింద్‌ ఎలాంటి చర్యలు తీసుకుంటారో, మేము కూడా అదే మార్గంలో న్యాయపరమైన చర్యలు తీసుకుంటాం’’ అని తెలిపారు.
సినిమాపై అంచనాలు, కాని వివాదాలు ఎక్కడివి?
విశ్వక్‌ సేన్‌ కొత్త అవతారం, లేడీ గెటప్‌ అనే ప్రత్యేకతల కారణంగా ‘లైలా’ సినిమా భారీ అంచనాలను ఏర్పరుచుకుంది. అయితే, తాజాగా చెలరేగిన ఈ వివాదాలు సినిమా విడుదలకు కొంత ఇబ్బంది కలిగించవచ్చు.
ప్రస్తుతం ఈ వివాదంపై ఇండస్ట్రీలో మిశ్రమ స్పందన వ్యక్తమవుతోంది. సినిమా విడుదల తర్వాతే అసలు నిజం ఏంటో తెలుస్తుందంటూ విశ్లేషకులు అభిప్రాయపడుతున్నారు.