తిరుమల: తిరుమల శ్రీవారి పుణ్యక్షేత్రంలో వైసీపీ ఎమ్మెల్సీ దువ్వాడ శ్రీనివాస్, ఆయన సహచరి దివ్వెల మాధురి తీసుకున్న ఫోటోషూట్ వ్యవహారం మరో మలుపు తీసుకుంది. తమ ప్రొటోకాల్ హక్కుల ప్రయోజనం తీసుకొని బ్రహ్మోత్సవాల సమయంలో వీరు తీసుకున్న రీల్స్, యూట్యూబ్ వీడియోలు, పెళ్లి వివాదాలు పెద్ద రచ్చకు దారి తీస్తున్నాయి. ఈ ఘటనపై ఇప్పటికే తిరుపతి పోలీస్ విభాగం దర్యాప్తు వేగవంతం చేస్తోంది.
తిరుమల ఈస్ట్ పోలీసులు దువ్వాడ శ్రీనివాస్, దివ్వెల మాధురికి 41ఏ నోటీసులు జారీ చేశారు. ఈ నెల 21-23 మధ్య తిరుపతిలో హాజరై విచారణకు రావాలని వారు కోరారు. నోటీసుల ప్రకారం వారు విచారణలో పాల్గొనాల్సి ఉంది.
కేసు పుట్టిన నేప‌థ్యం
తిరుమలలో శ్రీవారి దర్శనానికి వెళ్లిన దువ్వాడ శ్రీనివాస్, మాధురి జంట అక్కడ వీడియోలు తీసుకోవడమే కాకుండా రీల్స్ కూడా చేయించుకున్నారు. ప్రాథమికంగా, వారు స్వామివారి ద‌ర్శ‌నం సైలెంట్‌గా చేసుకుని వెళ్లి ఉంటే ఇబ్బంది ఉండేది కాదు. కానీ, వీరు ప్రొటోకాల్ ద‌ర్శ‌నం పొందిన విషయం, అక్కడ మీడియాతో పెళ్లి, విడాకులు వంటి వ్యక్తిగత అంశాల గురించి చర్చించడం వివాదాస్పదమైంది.
TTD విజిలెన్స్ అభ్యంత‌రం
విజిలెన్స్ అధికారులకు అందిన ఫిర్యాదుల ప్రకారం, పవిత్ర క్షేత్రాన్ని పర్యాటక ప్రాంతంగా మార్చి దుశ్చర్యలు జరిపారని ఆరోపణలు ఉన్నాయి. దాంతో తిరుమల ఈవో జె. శ్యామలరావు ఈ అంశాన్ని తిరుపతి ఈస్ట్ పోలీసులకు అప్పగించారు. ఇంతేకాదు, ప్రొటోకాల్ ద‌ర్శనాలను కొంతమంది అధికారులు గోప్యంగా నిర్వహించారని కూడా ఆరోపణలు వెలువడ్డాయి.
సోషల్ మీడియాలో రచ్చ
సోషల్ మీడియా వేదికగా ఈ సంఘటన పెద్ద ఎత్తున చర్చకు దారి తీసింది. “పవిత్ర క్షేత్రంలో రీల్స్ చేసేవాళ్లేంటి?” అంటూ హిందూ సంఘాలు మండిపడ్డాయి. జన జాగరణ సమితి నేతలు వీరిని తిరుమలకు శాశ్వతంగా నిషేధించాలని టీటీడీకి డిమాండ్‌లు పెట్టారు.
దువ్వాడ శ్రీనివాస్ స్పందన
తమపై వచ్చిన ఆరోపణలను తీవ్రంగా ఖండించిన దువ్వాడ శ్రీనివాస్, తమపై కేసులు పెట్టడంలో రాజకీయ కుట్ర దాగి ఉందని పేర్కొన్నారు. “తమపై వచ్చిన కేసులు అవాస్తవాలు, మేము నిబంధనలు ఉల్లంఘించలేదు” అంటూ వ్యాఖ్యానించారు.
మరింత విచారణలో..
తిరుపతి పోలీసులు దర్యాప్తు కొనసాగిస్తుండగా, మరింత సమాచారం వెలువడాల్సి ఉంది. ఈ కేసు దిశా నిర్దేశకంగా మారుతుందా లేక ఇది రాజకీయ మలుపులు తిరుగుతుందా అనేది ఆసక్తిగా మారింది.