హైదరాబాద్: హైదరాబాద్ నగరానికి తాగునీటి సమస్యకు శాశ్వత పరిష్కారం దిశగా మరో ముందడుగు!
నగర వాసులు ఎంతగానో ఎదురుచూస్తున్న గోదావరి ఫేజ్-2 తాగునీటి సరఫరా ప్రాజెక్టుకు తెలంగాణ ప్రభుత్వం శ్రీకారం చుట్టింది.
ఈ ప్రాజెక్టు పూర్తయితే హైదరాబాద్‌కు మంచినీటి సరఫరాలో భారీగా పెరుగుదల ఉంటుంది.
గోదావరి ఫేజ్-2 ప్రాజెక్టు: తాగునీటి సమస్యలను పరిష్కరించేందుకు, హైదరాబాద్ నగర ప్రజలు ఎప్పటి నుంచో ఎదురు చూస్తున్న గోదావరి ఫేజ్-2 ప్రాజెక్టుకు సర్కార్ గ్రీన్ సిగ్నల్ ఇచ్చింది.
ఈ ప్రాజెక్టు ద్వారా సుమారు ₹5,560 కోట్ల అంచనా వ్యయంతో మల్లన్న సాగర్ రిజర్వాయర్ నుంచి నగరానికి మరో 15 టీఎంసీల నీటిని తరలించేందుకు అనుమతి పొందింది.
ప్రాజెక్టు వివరాలు: వ్యయము: ₹5,560 కోట్లు
- నీటి సరఫరా: మల్లన్న సాగర్ రిజర్వాయర్ నుండి 15 టీఎంసీల నీరు
- మూలధనం: 40% హడ్కో లోన్, 60% పనులు చేపట్టే ఏజెన్సీ (తర్వాత ఈ నిధులను హైదరాబాద్ జలమండలి వడ్డీతో కలిపి చెల్లిస్తుంది)
- పూర్తి కాలం: రాబోయే రెండేళ్లలో పూర్తి చేయాలని లక్ష్యం!
నీటి అవసరాలు: ప్రస్తుతం, హైదరాబాద్ నగరంలో రోజుకు 750 మిలియన్ గ్యాలన్లు (ఎంజీడీ) తాగునీటి అవసరాలు ఉన్నాయి. వివిధ జలాశయాల నుంచి సుమారు 600 ఎంజీడీ మాత్రమే మంచినీరు సరఫరా చేస్తున్నారు. 2050 నాటికి ఈ డిమాండ్ 1014 ఎంజీడీకి పెరగనుంది.
గోదావరి నుంచి నీటి సరఫరా:ప్రతి ఏడాది గోదావరి నుంచి 10 టీఎంసీలు (రోజుకు 172 మిలియన్ గ్యాలన్లు) ఎల్లంపల్లి నుంచి నగరానికి తరలిస్తున్నారు. ఫేజ్-2 ద్వారా మరో 10 టీఎంసీలు తాగునీటి అవసరాలకు, 5 టీఎంసీలు మూసీ ప్రక్షాళనకు, జంట జలాశయాల పరిధిలోని ప్రాంతాలకు సరఫరా చేయనున్నారు.
శుద్ధి కేంద్రాలు మరియు పంప్‌హౌస్‌లు:గోదావరి నుంచి తరలించిన నీటిని శుద్ధి చేసేందుకు, రాజేంద్రనగర్, శామీర్‌పేట, గండిపేట వద్ద భారీ శుద్ధి కేంద్రాలు (WTP) నిర్మించనున్నారు. అలాగే, పంప్‌హౌస్‌లు, కరెంట్ ఉపకేంద్రాలు కూడా ఈ ప్రాజెక్టులో భాగంగా ఉంటాయి.
మురుగునీటి శుద్ధి కేంద్రాలు:ఓఆర్‌ఆర్ చుట్టూ కొత్తగా మురుగునీటి శుద్ధి కేంద్రాల నిర్మాణానికి రూ.3,849.10 కోట్లు విడుదల చేసినట్లు పురపాలక శాఖ కార్యదర్శి వెల్లడించారు.
సర్కార్ నిర్ణయం: ఇప్పుడు గోదావరి రెండో దశ ప్రాజెక్టు కోసం రూ.5,560 కోట్ల పనులకు గ్రీన్ సిగ్నల్ వచ్చింది. అనుకున్న సమయానికి ఈ పనులన్నీ పూర్తి చేయాలని లక్ష్యంగా పెట్టుకున్నట్లు పురపాలకశాఖ ముఖ్య కార్యదర్శి దాన కిషోర్ తెలిపారు.