హైదరాబాద్: అక్షయ తృతీయ పర్వదినం దగ్గరపడుతున్న వేళ బంగారం కొనుగోలుదారులకు ఊరట లభించింది. గత వారం రికార్డు స్థాయికి చేరుకున్న పసిడి ధరలు, మంగళవారం స్వల్పంగా తగ్గుముఖం పట్టాయి. ఫలితంగా పండుగ సీజన్‌ను ఆసరాగా తీసుకుని ప్రజలు బంగారం కొనుగోలుకు సిద్ధమవుతున్నారు.
దేశీయ మార్కెట్‌లో మంగళవారం సాయంత్రం 24 క్యారెట్ల 10 గ్రాముల బంగారం ధర రూ.600 తగ్గి రూ.95,400కి చేరింది. మధ్యాహ్నం మార్కెట్ ముగిసే సమయానికి పసిడి ధర రూ.691 మేర తగ్గుదలతో కాస్త ఉపశమనం ఇచ్చింది. గత వారం రూ.1 లక్ష మార్కును తాకిన ధరలు ప్రస్తుతం కొంత సర్దుబాటు అయ్యాయి.
అక్షయ తృతీయ పర్వదినానికి బంగారం కొనుగోలు శుభప్రదమని హిందూ సంప్రదాయంలో నమ్మకం ఉంది. ఈ నమ్మకమే అధిక ధరలు ఉన్నా కూడా కొనుగోళ్లను పెంచుతుందని నిపుణులు విశ్లేషిస్తున్నారు.
కామా జ్యువెలరీ మేనేజింగ్ డైరెక్టర్ కోలిన్ షా వ్యాఖ్యానిస్తూ, పండుగ సీజన్ సందర్భంగా కొనుగోలు సానుకూలంగా మారుతుందని చెప్పారు. బంగారం అమ్మకాలు 10-15 శాతం మేర పెరిగే అవకాశం ఉందని అంచనా వేశారు.
ఈ నేపథ్యంలో అక్షయ తృతీయ రోజున బంగారం కొనుగోలుకు మళ్లీ భారీ రద్దీ కనిపించే అవకాశాలు కనిపిస్తున్నాయి.