హైదరాబాద్: హైదరాబాద్ నుంచి విజయవాడ వెళ్లే ప్రయాణికులకు అదిరిపోయే శుభవార్త. ముఖ్యంగా మియాపూర్, పటాన్‌చెరు, బీహెచ్ఈఎల్ వంటి ప్రాంతాల ప్రయాణికులకు మరింత ఆనందం కలిగించే వార్త. సెప్టెంబర్ 30 (సోమవారం) నుంచి బీహెచ్ఈఎల్ డిపో నుంచి విజయవాడకు రెండు ఈ-గరుడ బస్సులను టీఎస్ ఆర్టీసీ ప్రారంభించనుంది.
ఈ కొత్త ఈ-గరుడ సర్వీసులు ప్రత్యేకత ఏమిటంటే, నగరంలోని ట్రాఫిక్‌ను పూర్తిగా దాటేసి, నేరుగా ఔటర్ రింగ్ రోడ్ (ఓఆర్ఆర్) మీదుగా విజయవాడ చేరుకుంటాయి. ఇది ప్రయాణికులకు ట్రాఫిక్ సమస్యలను తొలగించి, వేగవంతమైన ప్రయాణాన్ని అందిస్తుంది.
హైదరాబాద్‌లో ఆంధ్రప్రదేశ్ వాసులు అధికంగా నివసిస్తున్న కూకట్ పల్లి, మియాపూర్, లింగంపల్లి, బీహెచ్ఈఎల్, పటాన్‌చెరు ప్రాంతాలకు మరింత మేలు కలిగించడానికి ఈ బస్సులను టీఎస్ ఆర్టీసీ అందుబాటులోకి తీసుకువస్తోంది. రామచంద్రాపురం నుంచి బస్సులు బయలుదేరి, బీరంగూడ, చందానగర్, నిజాంపేట్ క్రాస్ రోడ్స్, జేఎన్టీయూ రైతు బజార్, మలేషియన్ టౌన్షిప్, శిల్పారామం, సైబర్ టవర్స్, టెలికాం నగర్ మీదుగా ఓఆర్ఆర్ ఎక్కి విజయవాడకు చేరుకుంటాయి.
ప్రతిరోజూ రాత్రి 9:30 గంటలకు మొదటి బస్సు, 10:30 గంటలకు మరొక బస్సు రామచంద్రాపురం నుంచి బయలుదేరుతుంది. విజయవాడ వెళ్లే ప్రయాణికులు ఈ సర్వీసును సద్వినియోగం చేసుకోవాలని రంగారెడ్డి రీజనల్ మేనేజర్ శ్రీలత సూచించారు.
దసరా పండుగ సందర్భంగా అక్టోబర్ 3 నుంచి 15 వరకు ఆర్టీసీ అదనపు ప్రత్యేక బస్సులను నడిపేందుకు సిద్ధమవుతోంది. విజయవాడ కనకదుర్గ అమ్మవారి నవరాత్రి ఉత్సవాలకు ఎక్కువ మంది చేరుకుంటారని, అలాగే పండగ సెలవులను గడపడానికి పల్లెటూళ్లకు వెళ్లే వారి సంఖ్య గణనీయంగా పెరుగుతుందని అధికారుల అంచనా.
వేగవంతమైన, సౌకర్యవంతమైన ప్రయాణాన్ని ఆస్వాదించాలనుకుంటున్న ప్రయాణికులు ఈ కొత్త ఈ-గరుడ సర్వీసులను వినియోగించుకోవాలని ఆర్టీసీ విజ్ఞప్తి చేసింది. మరిన్ని వివరాల కోసం అధికారిక వెబ్‌సైట్‌ను సందర్శించవచ్చు.