ఆంధ్రప్రదేశ్: ఏపీ ఫైబర్నెట్ ఛైర్మన్‌ పదవికి జీవీ రెడ్డి రాజీనామా – ప్రభుత్వం ఆమోదం
ఆంధ్రప్రదేశ్ ఫైబర్నెట్ ఛైర్మన్‌గా వ్యవహరిస్తున్న జీవీ రెడ్డి తన పదవికి రాజీనామా చేశారు. వ్యక్తిగత కారణాల వల్ల ఈ నిర్ణయం తీసుకున్నట్లు ఆయన తెలిపారు. ఫైబర్నెట్ ఛైర్మన్‌ పదవితో పాటు తెలుగుదేశం పార్టీ ప్రాథమిక సభ్యత్వం మరియు పార్టీ జాతీయ అధికార ప్రతినిధి పదవుల నుంచి కూడా వైదొలుగుతున్నట్లు ప్రకటించారు.
ఈ మేరకు తెదేపా అధినేత, ముఖ్యమంత్రి నారా చంద్రబాబు నాయుడు కు తన రాజీనామా లేఖను అందజేశారు. పదవికి రాజీనామా చేస్తున్నప్పటికీ, పార్టీపై తనకున్న ఆత్మీయ అనుబంధం ఎప్పటికీ అలాగే కొనసాగుతుందని పేర్కొన్నారు. పార్టీ తనపై ఉంచిన నమ్మకం, ఇచ్చిన మద్దతు, అప్పగించిన బాధ్యతలకు ధన్యవాదాలు తెలిపారు. ఇకపై పూర్తిగా న్యాయవాద వృత్తిలోనే కొనసాగుతానని స్పష్టం చేశారు.
భవిష్యత్తులో ఎటువంటి రాజకీయ పార్టీలో చేరే ఉద్దేశం లేదు
తాను ఏ రాజకీయ పార్టీలోనూ చేరాలని భావించడం లేదని, ప్రజా సేవలో కొనసాగాలన్న తన లక్ష్యం న్యాయవాద వృత్తి ద్వారా సాధిస్తానని జీవీ రెడ్డి వెల్లడించారు. పార్టీ కోసం అందించిన సేవలను గుర్తు చేసుకుంటూ, తెలుగుదేశం పార్టీ మరింత బలంగా ఎదగాలని ఆకాంక్షిస్తున్నట్లు తెలిపారు.
ఫైబర్నెట్ వివాదంపై నివేదిక సీఎం వద్దకు
జీవీ రెడ్డి రాజీనామాపై ఆంధ్రప్రదేశ్ ప్రభుత్వం అధికారికంగా ఆమోదం తెలిపింది.ఏపీ ఫైబర్‌నెట్‌లో జరుగుతున్న వివాదంపై నివేదిక ముఖ్యమంత్రి చంద్రబాబు నాయుడు వద్దకు చేరినట్లు సమాచారం.
ఈ నేపథ్యంలో ఫైబర్నెట్ ఎండీ దినేష్‌కుమార్‌ను ప్రభుత్వం బదిలీ చేయాలని నిర్ణయించింది. ఆయన్ను జనరల్ అడ్మినిస్ట్రేషన్ డిపార్ట్‌మెంట్‌ (GAD) కు రిపోర్ట్ చేయాలని ఆదేశాలు జారీ అయ్యాయి.
ఫైబర్నెట్ భవిష్యత్తు మార్గం?
ఏపీ ఫైబర్‌నెట్‌లో ఇటీవల నిర్వహణ, నిర్వహణ తీరుపై పలు ఆరోపణలు వచ్చిన సంగతి తెలిసిందే. కొత్తగా ఎవరు ఛైర్మన్‌గా బాధ్యతలు స్వీకరించబోతున్నారనే విషయంపై ఇంకా స్పష్టత రాలేదు. ప్రభుత్వం త్వరలోనే కీలక నిర్ణయం తీసుకునే అవకాశముంది.