మూవీడెస్క్: పవర్ స్టార్ పవన్ కళ్యాణ్ నటిస్తున్న పీరియాడిక్ డ్రామా హరిహర వీరమల్లు చివరి దశ షూటింగ్‌లో ఉంది.
ప్రస్తుతం పవన్ పూర్తి ఆసక్తితో ఈ షూటింగ్‌ను ముగించడానికి సిద్దమవుతున్నారు.
ఈ బిగ్ బడ్జెట్ మూవీ 2025 మార్చి 28న విడుదల చేయాలని నిర్మాతలు భావిస్తున్నారు.
దాదాపు 200 కోట్ల రూపాయల వ్యయంతో తెరకెక్కిన ఈ చిత్రం పాన్-ఇండియా స్థాయిలో భారీ అంచనాలు సొంతం చేసుకుంది.
అదే తేదీన విజయ్ దేవరకొండ, గౌతమ్ తిన్ననూరి కాంబినేషన్‌లో రూపొందుతున్న VD 12 కూడా విడుదల కావాల్సి ఉండగా, హరిహర వీరమల్లు విడుదల ఖరారు కావడంతో, VD 12 వాయిదా పడే అవకాశాలు కనిపిస్తున్నాయి.
అయితే, పవన్ కి సోలో రిలీజ్ డేట్ దొరకడం కష్టమేనని తెలుస్తోంది.
అదే తేదీకి మలయాళం నుంచి మోహన్ లాల్ ప్రధాన పాత్రలో L2: ఎంపురన్ మరియు హిందీలో సల్మాన్ ఖాన్, రష్మిక మందన నటిస్తున్న సికందర్ కూడా విడుదల కానున్నాయి.
దీంతో వీరమల్లుకు గట్టి పోటీ ఎదురవుతుందని సినీ విశ్లేషకులు భావిస్తున్నారు.
ఇలాంటి భారీ చిత్రాలతో పోటీ పడటం పవన్ కళ్యాణ్ చిత్రానికి పెద్ద రిస్క్ అనిపిస్తున్నా, పవన్ కు జాతీయ స్థాయి ఫాలోయింగ్ ఉండటంతో ఈ పోటీని సానుకూలంగా మలచే అవకాశం ఉందని మేకర్స్ విశ్వసిస్తున్నారు.