తెలంగాణ: హెచ్‌సీయూ భూముల వివాదం – వరల్డ్ బిగ్గెస్ట్ ఎకో పార్క్ నిర్మాణానికి ప్లాన్?
హైదరాబాదు సెంట్రల్ యూనివర్సిటీ (Hyderabad Central University – HCU) భూముల వివాదం కొత్త మలుపు తిరుగుతోంది. తెలంగాణ ప్రభుత్వం 400 ఎకరాల్లోనే కాకుండా, మొత్తం 2000 ఎకరాల విస్తీర్ణంలో ప్రపంచంలోనే అతిపెద్ద ఎకో పార్క్ (Eco Park) నిర్మించాలని యోచిస్తోంది.
ఈ ప్రాజెక్ట్ సింగపూర్ నైట్ సఫారీ మరియు న్యూయార్క్ సెంట్రల్ పార్క్ తరహాలో ఉండేలా రూపకల్పన చేయనున్నట్లు తెలుస్తోంది.
ప్రభుత్వ నిర్ణయం – కమిటీ ఏర్పాటు
హెచ్‌సీయూ భూములపై ప్రస్తుతం పెద్ద చర్చ జరుగుతుండగా, దీనికి పరిష్కారం చూపేందుకు ప్రభుత్వం ప్రత్యేక కమిటీని ఏర్పాటు చేసింది.
ఈ కమిటీ భూవివాదం మాత్రమే కాకుండా, ప్రతిపాదిత ఎకో పార్క్ ప్రాజెక్ట్‌ను కూడా పరిశీలించనుంది.
యూనివర్సిటీ సహకరించడానికి అంగీకరిస్తే, మొత్తం 2000 ఎకరాల్లో ఈ ప్రాజెక్ట్ చేపట్టేందుకు సన్నాహాలు చేస్తున్నట్లు సమాచారం.
హెచ్‌సీయూ భూములపై మంత్రుల కమిటీ సమావేశాలు
ప్రభుత్వ ప్రణాళిక ప్రకారం, యూనివర్సిటీకి ఫోర్ట్ సిటీ ప్రాంతంలో ప్రత్యామ్నాయ భూమి కేటాయించడం, అవసరమైన మౌలిక సదుపాయాలను అభివృద్ధి చేయడం వంటి ప్రతిపాదనలు ఉన్నాయి. ఈ అంశాలపై మంత్రుల కమిటీ భాగస్వాములతో సంప్రదింపులు జరపనుంది.
గచ్చిబౌలి భూముల చుట్టూ వివాదం
ప్రస్తుతం గచ్చిబౌలి 400 ఎకరాల భూమిని తెలంగాణ ప్రభుత్వం స్వాధీనం చేసుకుంది. అయితే, ఈ భూమిని పారిశ్రామిక అవసరాలకు అభివృద్ధి చేయాలని ప్రభుత్వం భావిస్తుండగా, హెచ్‌సీయూ విద్యార్థులు, బీఆర్ఎస్, బీజేపీ ఇలా అన్ని వర్గాలు వ్యతిరేకంగా నిలిచాయి.
ఈ వివాదంపై తెలంగాణ హైకోర్టు కూడా మధ్యప్రవేశించడంతో పరిస్థితి మరింత ఉద్రిక్తంగా మారింది.
TGIIC క్లారిఫికేషన్ – భూముల యాజమాన్యం ఎవరిదీ?
తెలంగాణ స్టేట్ ఇండస్ట్రియల్ ఇన్‌ఫ్రాస్ట్రక్చర్ కార్పొరేషన్ (TGIIC) 400 ఎకరాల భూమి హెచ్‌సీయూ పరిధిలో లేదని స్పష్టతనిచ్చింది. 21 ఏళ్ల క్రితం ప్రైవేట్ సంస్థకు కేటాయించిన ఈ భూమిని, న్యాయపోరాటం ద్వారా ప్రభుత్వం తిరిగి స్వాధీనం చేసుకుందని తెలిపింది.
2024 జులై 19న రెవెన్యూ మరియు యూనివర్సిటీ అధికారులతో కలిసి సర్వే నిర్వహించి భూమి హద్దులను నిర్ధారించారని పేర్కొంది.
2004లోనే హెచ్‌సీయూ భూముల హక్కులను వదులుకున్నదా?
తెలంగాణ ప్రభుత్వం తెలిపిన వివరాల ప్రకారం, 2004లో హెచ్‌సీయూ ఈ భూములపై హక్కులను వదులుకుంది. మొత్తం 5534 ఎకరాలను ప్రభుత్వం స్వాధీనం చేసుకున్నదని, దీనికి బదులుగా గోపనపల్లి వద్ద 397 ఎకరాలు యూనివర్సిటీకి కేటాయించారని వివరించింది.
అయితే, ఇప్పుడు యూనివర్సిటీ ఈ భూములపై యాజమాన్య హక్కులను తిరిగి అభ్యంతరం వ్యక్తం చేయడం వెనక రాజకీయ కోణం ఉందని ప్రభుత్వం అంటోంది.
BRS హయాంలో అక్రమ భూకబ్జా జరిగిందా?
కాంగ్రెస్ నేతలు హెచ్‌సీయూ భూములపై గతంలో బీఆర్ఎస్ ప్రభుత్వ హయాంలో అక్రమాలు జరిగాయని ఆరోపిస్తున్నారు. 50 ఎకరాల భూమిని మైహోమ్ రామేశ్వర్ రావుకు కేటాయించి, మైహోమ్ విహంగ పేరుతో అపార్ట్‌మెంట్లు నిర్మించారని కాంగ్రెస్ మండిపడుతోంది.
అప్పట్లో బీఆర్ఎస్, బీజేపీ ఆందోళన చేయలేదని, ఇప్పుడు మాత్రం ప్రభుత్వాన్ని లక్ష్యంగా చేసుకుంటున్నాయని విమర్శిస్తోంది.
HCU భూముల వివాదంపై మంత్రి శ్రీధర్‌బాబు స్పందన
బీఆర్ఎస్ అధినేత కేటీఆర్ ఇటీవల హెచ్‌సీయూ భూములపై చేసిన వ్యాఖ్యలకు మంత్రి శ్రీధర్‌బాబు కౌంటర్ ఇచ్చారు.
‘‘భూమిని దోచుకున్నవారే ఇప్పుడు కాపాడతామని చెబుతున్న తీరు హాస్యాస్పదం’’ అని అన్నారు.
‘‘ప్రభుత్వం హెచ్‌సీయూ భూములను కబ్జా చేయడం లేదని, యూనివర్సిటీకి చెందిన భూముల్లో అంగుళం కూడా ప్రభుత్వం తాకలేదని’’ స్పష్టం చేశారు.
రెచ్చగొట్టే ప్రయత్నాలు మానుకోవాలని హెచ్చరిక
‘‘సోషల్ మీడియా ద్వారా ఫేక్ ఫోటోలు, వీడియోలతో తప్పుడు ప్రచారం చేస్తున్నారు. విద్యార్థులను రెచ్చగొట్టే చర్యలను బీఆర్ఎస్ నేతలు మానుకోవాలి’’ అని శ్రీధర్‌బాబు తీవ్రంగా వ్యాఖ్యానించారు.
‘‘ఓయూ భూముల్లో బీఆర్ఎస్ డబుల్ బెడ్రూమ్ ఇళ్ల నిర్మాణం చేపట్టాలని ప్రయత్నించింది. కానీ విద్యార్థుల నిరసనతో వెనక్కి తగ్గింది. ఇప్పుడు అదే పార్టీ హెచ్‌సీయూ భూముల గురించి మాట్లాడటం ద్వంద్వ వైఖరిని సూచిస్తోంది’’ అని మంత్రి విమర్శించారు.