హిందూపురం కుర్చీ కోసం క్యాంపు రాజకీయం

హిందూపురం: మునిసిపాలిటీ చైర్‌పర్సన్ ఎన్నికపై రాజకీయ ఉత్కంఠ పెరిగింది. గత ఎన్నికల్లో వైసీపీ 30 వార్డులు గెలవగా, టీడీపీ కేవలం 8 వార్డులతో పరిమితమైంది. అయితే, 2024 సార్వత్రిక ఎన్నికల్లో హిందూపురం ఎమ్మెల్యేగా నందమూరి బాలకృష్ణ హ్యాట్రిక్ విజయం సాధించిన తర్వాత మునిసిపాలిటీలో రాజకీయ సమీకరణాలు మారాయి.

అభివృద్ధి కార్యక్రమాలతో పాటు రాజకీయ వ్యూహాలతో టీడీపీ పట్టు బిగించింది. ఈ క్రమంలో బాలకృష్ణ నేతృత్వంలో టీడీపీ వైసీపీ కౌన్సిలర్లను తనవైపు తిప్పుకోవడంలో విజయం సాధించింది.

ఇప్పటివరకు 12 మంది వైసీపీ కౌన్సిలర్లు టీడీపీకి మద్దతుగా మారారు. దీంతో టీడీపీకి మొత్తం 20 మంది సభ్యులతో క్లియర్ మెజారిటీ ఏర్పడింది. ఈ పరిస్థితుల్లో ఫిబ్రవరి 3న మునిసిపల్ చైర్‌పర్సన్ ఎన్నికను నిర్వహించేందుకు అధికారులు సిద్ధమయ్యారు.

ఎన్నికలో ఎలాంటి మార్పులు లేకుండా తమ కౌన్సిలర్లను కాపాడుకోవాలనే ఉద్దేశంతో టీడీపీ క్యాంపు రాజకీయాలకు తెరలేపింది. తన వశమైన కౌన్సిలర్లను హిందూపురం సమీపంలోని పెనుకొండ రిసార్ట్‌కు తరలించింది.

ఎన్నిక రోజున వారిని నేరుగా మునిసిపల్ కార్యాలయానికి తీసుకురావాలని టీడీపీ ప్లాన్ చేస్తోంది. ఈ వ్యూహంతో హిందూపురం మునిసిపాలిటీ పగ్గాలు టీడీపీ వశమయ్యే అవకాశం కనిపిస్తోంది.