2029 నాటికి ప్రతి ఒక్కరికీ ఇల్లు – త్వరలో మెగా DSC నోటిఫికేషన్
అమరావతి: ఆంధ్రప్రదేశ్ అసెంబ్లీ సమావేశాల్లో గవర్నర్ జస్టిస్ అబ్దుల్ నజీర్ ఉభయ సభలను ఉద్దేశించి ప్రసంగించారు. రాష్ట్ర ప్రజలు ఎన్డీఏ ప్రభుత్వానికి అపూర్వమైన తీర్పునిచ్చారు అని కొనియాడిన ఆయన, గత వైసీపీ ప్రభుత్వంలో రాష్ట్రానికి తీవ్ర ఆర్థిక నష్టం జరిగినట్లు తెలిపారు. 2029 నాటికి ప్రతి ఒక్కరికీ ఇల్లు అందించే లక్ష్యంతో ప్రభుత్వం పని చేస్తుందని, త్వరలో మెగా DSC నోటిఫికేషన్ విడుదల చేయనున్నట్లు తెలిపారు.
గత పాలనతో దెబ్బతిన్న ఆర్థిక క్రమబద్ధీకరణ
గత ప్రభుత్వం వల్ల రాష్ట్రం లక్షల కోట్ల రూపాయల అప్పుల భారాన్ని ఎదుర్కొంటోందని, వనరుల దోపిడీ, ఆర్థిక అక్రమాలు వల్ల దీర్ఘకాలిక నష్టం కలిగిందని గవర్నర్ తెలిపారు. రాష్ట్ర అభివృద్ధిని వేగవంతం చేయడానికి సూక్ష్మ పరిశీలనతో ప్రణాళికలు రూపొందించామన్నారు.
సూపర్ సిక్స్ హామీల అమలు
ప్రజలకు ఇచ్చిన హామీలను నెరవేర్చేందుకు సీఎం చంద్రబాబు నాయుడు ప్రభుత్వం కీలక నిర్ణయాలు తీసుకుంటోందని గవర్నర్ వెల్లడించారు. ముఖ్యంగా సామాజిక భద్రతా పెన్షన్ రూ.4,000కు పెంపు, 204 అన్న క్యాంటీన్ల పునరుద్ధరణ, ఉచిత ఇసుక విధానం, గ్రామీణ మౌలిక సదుపాయాల అభివృద్ధి వంటి హామీలను అమలు చేస్తున్నట్లు తెలిపారు.
మెగా DSC పై..
విద్యా రంగాన్ని బలోపేతం చేసేందుకు ప్రభుత్వం 16,347 ఉపాధ్యాయ నియామకాలకు మెగా DSC నోటిఫికేషన్ ప్రకటించనుంది. ఉపాధి అవకాశాలను మెరుగుపరిచేందుకు నైపుణ్య గణన (Skill Census) నిర్వహించనుంది.
పెట్టుబడుల ఊతంతో 4 లక్షల ఉద్యోగాలు
ఆంధ్రప్రదేశ్‌ను పెట్టుబడుల కేంద్రంగా మార్చేందుకు ప్రభుత్వం రూ.6.5 లక్షల కోట్ల పెట్టుబడులు ఆకర్షించిందని గవర్నర్ తెలిపారు. వీటి ద్వారా 4 లక్షల మందికి ఉపాధి అవకాశాలు లభించనున్నాయి.
74 కేంద్ర పథకాల పునరుద్ధరణ – రూ.9,371 కోట్ల అప్పుల చెల్లింపు
గత ప్రభుత్వం నిలిపివేసిన 93 కేంద్ర ప్రాయోజిత పథకాల్లో 74 పథకాలను పునరుద్ధరించామని, ఇప్పటికే రూ.9,371 కోట్ల అప్పులు తీర్చామని గవర్నర్ తెలిపారు.
ప్రాజెక్టులకు నూతన ఊపు
ఎన్డీఏ ప్రభుత్వం హామీ ఇచ్చినట్లు పోలవరం ప్రాజెక్టు, అమరావతి రాజధాని అభివృద్ధిని వేగవంతం చేస్తున్నట్లు గవర్నర్ ప్రకటించారు. అలాగే విశాఖ ఉక్కు కర్మాగారం పునరుద్ధరణ, కొత్త రైల్వే జోన్ ఏర్పాటు వంటి ప్రాజెక్టులను కూడా ప్రాధాన్యంగా చేపడుతున్నామని తెలిపారు.
ప్రతిపక్షంగా వైసీపీ గుర్తింపు వివాదం
వైఎస్సార్ కాంగ్రెస్ పార్టీ (వైసీపీ) సభ్యులు తమ పార్టీకి అధికారిక ప్రతిపక్ష హోదా ఇవ్వాలని అసెంబ్లీలో నినాదాలు చేశారు. “ప్రజాస్వామ్యాన్ని ఖూనీ చేస్తున్నారు” అంటూ “వీ వాంట్ జస్టిస్”, “సేవ్ డెమోక్రసీ” అంటూ నినాదాలు చేశారు. అయితే, నిరసనల మధ్యే గవర్నర్ తన ప్రసంగాన్ని కొనసాగించారు.
వచ్చే ఐదేళ్లలో రాష్ట్ర పునర్నిర్మాణం
ఆంధ్రప్రదేశ్ ప్రభుత్వ ప్రధాన లక్ష్యం రాష్ట్ర పునరుజ్జీవనం అని గవర్నర్ నజీర్ స్పష్టం చేశారు. ఆర్థిక సంస్కరణలు, మౌలిక వసతుల అభివృద్ధి, పెట్టుబడుల పెంపు, విద్యా & ఆరోగ్య రంగాల్లో విప్లవాత్మక మార్పులు తెచ్చేందుకు ప్రభుత్వం పని చేస్తుందని తెలిపారు.