అమరావతి: ఏపీలో వెలుగులోకి 108 సేవల భారీ కుంభకోణం
ఆంధ్రప్రదేశ్‌లో 108 అత్యవసర సేవల నిర్వహణపై భారీ అవకతవకలు చోటు చేసుకున్నాయని ఆరోపణలు వినిపిస్తున్నాయి.
మంత్రి సత్యకుమార్ యాదవ్ మీడియా ముందు సంచలన వ్యాఖ్యలు చేస్తూ, 2020 నుంచి అరబిందో సంస్థ 108 సేవలను దుర్వినియోగం చేసి వందలాది కోట్ల రూపాయలు దోచుకుందన్నారు.
అసెంబ్లీ సిటింగ్‌లో ఎమ్మెల్యేలు సోమిరెడ్డి చంద్రమోహన్ రెడ్డి, ధూళిపాళ నరేంద్రలు 108 సేవల నిర్వహణపై కాలింగ్ అటెన్షన్ కింద రూల్ 74 ప్రకారం వివరాలు కోరారు.
అవకతవకల వివరాలు
2005లో ప్రారంభమైన 108 అత్యవసర సేవలు 2016లో ఏకో అంబులెన్స్ సేవ కోసం నెలకు రూ. 1,30,001 చెల్లింపుతో ఒప్పందం చేసుకున్నాయి.
కానీ 2020లో పాత అంబులెన్స్‌లకు రూ. 2,27,257 చెల్లించేలా, కొత్త వాహనాలకు రూ. 1,75,078 చెల్లించేలా మార్పులు చేశారని మంత్రి ఆరోపించారు.
సరైన సేవలు అందించకపోవడంతో 108 వ్యవస్థ తీవ్రంగా దెబ్బతిందని, గోల్డెన్ హవర్ సమయంలో రోగులను ఆస్పత్రులకు చేర్చడంలో 11 నుంచి 20 శాతం మాత్రమే విజయవంతమయ్యారని తెలిపారు.
సిబ్బందికి ఆర్థిక ఇబ్బందులు
అత్యవసర సేవలైన 108, గ్రామీణ ప్రాంతాల్లో వైద్య సేవలు అందించే 104 వాహనాల సిబ్బంది ఆర్థిక ఇబ్బందులను ఎదుర్కొంటున్నారు.
నాలుగు నెలలుగా వేతనాలు చెల్లించకపోవడంతో, కుటుంబ పోషణ కోసం అప్పులు చేయాల్సి వస్తోందని వారు వాపోతున్నారు.
అరకొర వేతనాలు, పనికి తగ్గా వేతనాలు అందకపోవడం, పాత స్లాబ్ ప్రకారమే చెల్లింపులు జరగడం వల్ల సిబ్బంది తీవ్ర ఆందోళనకు గురవుతున్నారు.
స్కాంలో అరబిందో బాధ్యతలు
వైసీపీ ప్రభుత్వ హయాంలో 108, 104 వాహనాల నిర్వహణ బాధ్యతలను చేపట్టిన అరబిందో సంస్థపై ఇప్పటికే పలు ఆరోపణలు ఉన్నాయి.
టీడీపీ కూటమి ప్రభుత్వం ఏర్పాటైన తర్వాత వీటి అక్రమాలపై ప్రత్యేక దృష్టి సారించి, అరబిందో సంస్థను నిర్వహణ బాధ్యతల నుంచి తొలగించింది.
ఈ చర్య వల్ల సిబ్బంది తమకు రావలసిన బకాయి వేతనాలపై స్పష్టత కోరుతున్నారు.
ప్రభుత్వం నుంచి బిల్లులు వస్తేనే వేతనాలు చెల్లిస్తామని అరబిందో సంస్థ చెప్పడం మరింత ఆందోళన కలిగిస్తోంది.
వేతన సమస్యలు
104 సర్వీసుల్లో పైలెట్లకు రూ. 12,900, డేటా ఎంట్రీ ఆపరేటర్లకు రూ. 12,500 మాత్రమే చెల్లిస్తున్నారు.
2016 నుంచి పనిచేస్తున్న వారికి కొత్త జీఓ ప్రకారం రూ. 18,500 వేతనం ఇవ్వాల్సి ఉన్నా అమలు జరగడం లేదని సిబ్బంది చెబుతున్నారు.
వాహనాల నిర్వహణ సరిగా లేక టైర్లు మారడం, డీజిల్ కోసం ఇబ్బంది పడటంతో సేవలు మరింత దిగజారినట్లు వాపోతున్నారు.