అంతర్జాతీయం: భార్యపై భర్త క్రూరత్వం: 20 ఏళ్ళు జైలు శిక్ష
భార్యపై అమానుషంగా ప్రవర్తించి, ఇతరులను భాగస్వామిగా చేసి రేప్‌ చేయించిన భర్తకు ఫ్రాన్స్‌ కోర్టు కఠిన శిక్ష విధించింది. ఈ ఘటన ఫ్రెంచ్‌ నగరం అవిగ్నాన్‌ను మాత్రమే కాదు, ప్రపంచాన్ని కూడా నివ్వెరపరిచింది.
72 ఏళ్ల డొమినిక్‌ పెలికాట్‌ అనే వ్యక్తి, తన భార్యకు మత్తుమందు ఇచ్చి, ఆన్‌లైన్‌లో పరిచయమైన 50 మంది అపరిచితులతో ఆమెపై అత్యాచారం చేయించాడు. ఆ దారుణాలను వీడియోలుగా రికార్డ్‌ చేయడంతో ఈ కేసు వెలుగులోకి వచ్చింది. కోర్టు విచారణలో అతని చర్యలపై తీవ్ర ఆగ్రహం వ్యక్తమైంది.
డొమినిక్‌కు 20 ఏండ్ల జైలుశిక్షతో పాటు, ఈ అమానుష చర్యలో భాగస్వాములైన మిగిలిన 50 మందికి కూడా శిక్షలు విధిస్తూ కోర్టు తీర్పు వెలువరించింది. తీర్పు తర్వాత బాధితురాలి కుటుంబ సభ్యులు, మద్దతుదారులు సంబరాలు జరిపారు.
బాధితురాలి ధైర్యం
కోర్టు విచారణలో బాధితురాలు గిసెల్‌ తన వివరాలను గోప్యంగా ఉంచే హక్కు ఉన్నప్పటికీ, దానిని తిరస్కరించి, తన భర్త రికార్డ్‌ చేసిన దారుణ వీడియోలను కోర్టులో చూడాలని కోరారు. ఈ వీడియోలు చూపడం ద్వారా ఇతర మహిళలలో చైతన్యం రాగలదని ఆమె నమ్మకం వ్యక్తం చేశారు.
కోర్టు వ్యాఖ్యలు
డొమినిక్‌ తనను తాను రేపిస్టుగా అంగీకరించి, మిగిలిన వ్యక్తులు కూడా పూర్తి స్పృహతోనే ఈ దారుణానికి పాల్పడ్డారని విచారణలో వెల్లడించాడు. కోర్టు ఈ క్రూరతను “మానవత్వానికి అవమానకరమైన చర్య”గా అభివర్ణించింది.
ఈ తీర్పు ఫ్రాన్స్‌లోని మహిళా హక్కుల ఉద్యమాలకు మద్దతు నిచ్చేలా మారింది. గిసెల్‌ వంటి ధైర్యవంతమైన మహిళలు తమ బాధలను బహిరంగంగా చెబితే, మరిన్ని ఇలాంటి ఘటనలు బయటకు వస్తాయని నిపుణులు అభిప్రాయపడ్డారు.