అంతర్జాతీయం: ట్రంప్ విధానాలపై వలసదారుల ఉత్కంఠ: ఇండియాకు వెళ్ళేందుకు జంకుతున్న ఎన్నారైలు!
అమెరికా అధ్యక్షుడిగా ట్రంప్ బాధ్యతలు చేపట్టిన తర్వాత వలస విధానాలు ఎలా మారతాయన్న ఉత్కంఠ భారతీయ వలసదారులను ఆందోళనలోకి నెట్టేసింది. హెచ్-1బీ వీసాదారులు, ముఖ్యంగా భారతీయులు, ట్రంప్ ప్రభుత్వం ఆంక్షలను కఠినతరం చేస్తుందేమోనన్న భయంతో తమ స్వదేశానికి వెళ్లేందుకు జంకుతున్నారు.
అంతర్జాతీయ మీడియా కథనాల ప్రకారం, ఇండియాలో ఉన్న హెచ్-1బీ వీసా హోల్డర్లను జనవరి 20 లోపే తిరిగి అమెరికాకు రావాలని కంపెనీలు, విద్యాసంస్థలు సూచిస్తున్నాయి. ఇది, ఒకసారి అమెరికా దాటి వెళ్లి తిరిగి రాలేమోనన్న భయాలను పెంచుతోంది.
హెచ్-1బీ వీసా విషయమై ట్రంప్ మద్దతుదారుల మధ్య విభేదాలు స్పష్టంగా కనిపిస్తున్నాయి. ఎలాన్ మస్క్, వివేక్ రామస్వామి వంటి ప్రముఖులు ఈ వీసాలను మద్దతు పలుకుతుండగా, మరికొందరు ఈ వీసాలకు పరిమితులు విధించాలని డిమాండ్ చేస్తున్నారు. వీరి నిగ్రహానికి ప్రధాన కారణం స్థానిక ఉద్యోగాలపై వలసదారుల ప్రభావం.
ట్రంప్ ప్రభుత్వంలో భారతీయ వెంచర్ క్యాపిటలిస్టు శ్రీరామ్ కృష్ణన్‌కు ఏఐ సలహాదారు పదవి లభించడం మరో చర్చనీయాంశంగా మారింది. శ్రీరామ్ 2007లో అమెరికాకు వెళ్లి మైక్రోసాఫ్ట్‌లో పనిచేసి, అమెరికా పౌరసత్వం పొందారు. ట్రంప్ మద్దతుదారులు ఆయన గత వ్యాఖ్యలను ప్రస్తావిస్తూ హెచ్-1బీ వీసాలపై ఆంక్షలు విధించాలని డిమాండ్ చేస్తున్నారు.
వలసలపై ట్రంప్ పరస్పర విరుద్ధ వ్యాఖ్యలు కూడా అనిశ్చితిని మరింత పెంచాయి. ఒకవైపు వలసదారులపై ఆంక్షలు తప్పవని ప్రకటించగా, మరోవైపు మేధావులను ఆహ్వానిస్తామని చెప్పారు. ఇది వలసదారుల్లో గందరగోళాన్ని కలిగిస్తోంది.
2023లో హెచ్-1బీ వీసాలు పొందిన, రెన్యూ చేసుకున్న వారి సంఖ్య 2.78 లక్షలు. వీరిలో 72% మంది భారతీయులే. ముఖ్యంగా కంప్యూటర్ రంగంలో పనిచేసే వలసదారులే అధిక సంఖ్యలో ఉన్నారు. హెచ్-1బీ వీసాదారుల సగటు వార్షిక వేతనం 1,18,000 డాలర్లు.
ఇందుకాక, వలసదారుల భవిష్యత్తు అనిశ్చితిలో పడకుండా ఉండేందుకు ట్రంప్ ప్రభుత్వం ఎటువంటి నిర్ణయాలు తీసుకుంటుందన్నది ఆసక్తిగా మారింది.