అమరావతి: అన్నదాత సుఖీభవ అమలు – ఏపీ ప్రభుత్వానికి పరీక్షాసమయం!
నిధుల సమీకరణ కీలకం
ఏపీ ప్రభుత్వం ఏప్రిల్ నుంచి అన్నదాత సుఖీభవ పథకాన్ని అమలు చేయాలని సిద్ధమవుతోంది. అయితే, నిధుల లభ్యత ఈ పథకానికి పెద్ద సవాలుగా మారుతోంది. ప్రభుత్వ బడ్జెట్‌పై విపరీతమైన ఒత్తిడి ఉండగా, ఈ పథకాలను ఎలా అమలు చేస్తుందో అనేది ప్రశ్నార్థకంగా మారింది.
ఏప్రిల్‌లో అన్నదాత సుఖీభవ కోసం రూ.2,000 కోట్లు
ఏపీ ప్రభుత్వం 41.77 లక్షల మంది రైతులకు ఒక్కొక్కరికి రూ.14,000 చొప్పున అందించాల్సి ఉంది. ఇది మూడు విడతల్లో చెల్లించనుండగా, ఒక్క విడతకు రూ.2,000 కోట్లు అవసరం. మొత్తంగా రూ.6,000 కోట్లు కేటాయించాల్సి ఉంది.
తల్లికి వందనం కోసం రూ.5,000 కోట్లు అవసరం
తల్లికి వందనం పథకం కింద విద్యార్థుల చదువుకు ప్రభుత్వం ఒక్కో కుటుంబానికి రూ.15,000 చెల్లించనుంది. ఈ లెక్కన కుటుంబంలో ఒక విద్యార్థికి పధకం ఇస్తే సంవత్సరానికి దాదాపు రూ.7,000 కోట్లు అవసరం అవుతాయి. ఒక కుటుంబంలో ఇద్దరు విద్యార్థులకు ఇవ్వాలంటే.. సంవత్సరానికి రూ.14,000 కోట్లు అవసరం అవుతాయి. మేలో అమలు ప్రారంభమయ్యే ఈ పథకానికి ఏప్రిల్, మే నెలల్లోనే కనీసం రూ.5,000 కోట్లు సమీకరించాల్సిన అవసరం ఉంది.
నిరుద్యోగ భృతి, ఉచిత బస్సు ప్రయాణం – అదనపు భారం
ఏప్రిల్ నెలలో నిరుద్యోగ భృతి అందించాలంటే రూ.2,000 కోట్లు అవసరం. ఉచిత బస్సు ప్రయాణం కోసం నెలకు రూ.500 కోట్లు అవసరం. పెన్షన్ల కోసం రూ.3,000 కోట్లు కేటాయించాలి. ఉచిత గ్యాస్ సిలిండర్ పథకం కోసం ఏప్రిల్ నుంచి జులై వరకూ రూ.8,000 కోట్లు అవసరమవుతాయి.
రూ.20,000 కోట్ల అవసరం – ఆదాయం ఎలా?
ఏప్రిల్, మే నెలల్లోనే రూ.20,000 కోట్లకు పైగా నిధులు సమీకరించాల్సిన అవసరం ఉంది. కానీ, రాష్ట్రానికి వచ్చే ఆదాయం తక్కువగా ఉండటంతో ఈ సవాలును ఎలా అధిగమిస్తారనేది చూడాలి. పెట్టుబడులను ఆకర్షించి, రెవెన్యూ జెనరేట్ చేయడమే ప్రభుత్వం ప్రధాన లక్ష్యం.
అభివృద్ధి vs సంక్షేమం – ప్రజల అంచనాలు
గత వైసీపీ ప్రభుత్వం సంక్షేమ పథకాల అమలుపై దృష్టి పెట్టి అభివృద్ధిని నిర్లక్ష్యం చేసింది. కానీ, ప్రస్తుత ప్రభుత్వం సంక్షేమం, మౌలిక సదుపాయాల కల్పన రెండింటినీ సమతుల్యం చేయాలనే లక్ష్యంతో ఉంది. రోడ్లు, గ్రామ అభివృద్ధి, ఆరోగ్య రంగంపై దృష్టి పెట్టిన ప్రభుత్వం, ఇప్పుడు ప్రజల కోసం హామీ ఇచ్చిన పథకాలను కూడా అమలు చేయాల్సిన సమయం వచ్చేసింది.