ఇంగ్లండ్‌తో ఐదు మ్యాచ్‌ల టీ20 సిరీస్‌ను గెలిచిన టీమిండియా, అదే ఊపుతో వన్డే సిరీస్‌ను కూడా సొంతం చేసుకోవాలని ఉత్సాహంగా ఉంది. మూడు వన్డేల సిరీస్‌లో మొదటి మ్యాచ్ ఫిబ్రవరి 6న జరగనుండగా, బీసీసీఐ జట్టును ప్రకటించింది.
అయితే, చివరి నిమిషంలో మిస్టరీ స్పిన్నర్ వరుణ్ చక్రవర్తికి కూడా అవకాశం కల్పించింది. టీ20 సిరీస్‌లో వరుణ్ చక్రవర్తి అద్భుత ప్రదర్శన కనబరిచాడు. ఐదు మ్యాచ్‌ల్లో 14 వికెట్లు తీసి మ్యాన్ ఆఫ్ ది సిరీస్‌గా నిలిచిన అతడిని వన్డే సిరీస్‌కు ఎంపిక చేయాలని బీసీసీఐ నిర్ణయించింది.
భారత పిచ్‌లపై ఇంగ్లండ్ భారీ హిట్టర్లకు కళ్లెం వేయగలడన్న ఉద్దేశంతో వరుణ్‌కు అవకాశం ఇచ్చినట్లు తెలుస్తోంది. ముందుగా ప్రకటించిన 15 మందితో కూడిన జట్టులో అతడి పేరు లేకపోయినా, తర్వాత ప్రత్యేక ప్రకటన ద్వారా వరుణ్ చక్రవర్తిని జట్టులో చేర్చారు.
కెప్టెన్ రోహిత్ శర్మ నేతృత్వంలో యువ, అనుభవజ్ఞుల సమ్మేళనంగా జట్టు సిద్ధమైంది. ఈ సిరీస్ భారత్‌కు కీలకమైనది. వరుణ్ చక్రవర్తి వన్డేల్లోనూ తన స్పిన్ మాయాజాలంతో ఇంగ్లండ్‌ను కట్టడి చేయగలడా? అనేది ఆసక్తిగా మారింది.