అంతర్జాతీయం: మహిళలపై వెస్ట్‌బ్యాంక్‌లో ఇజ్రాయెల్ కాల్పుల భీభత్సం – గర్భిణి సహా ఇద్దరు మహిళలు మృతి
ఇజ్రాయెల్ సైన్యం (IDF) చేపట్టిన తాజా దాడుల్లో వెస్ట్‌బ్యాంక్‌లో తీవ్ర ఉద్రిక్తత చోటుచేసుకుంది. మిలిటెంట్‌లే లక్ష్యమని ప్రకటించిన ఈ దాడుల్లో సామాన్య పౌరుల మరణాలు పెరుగుతున్నాయి. ఇటీవల జరిగిన కాల్పుల్లో ఓ ఎనిమిది నెలల గర్భిణి ప్రాణాలు కోల్పోవడం ప్రపంచవ్యాప్తంగా ఆందోళనకు కారణమైంది.
గర్భిణిపై కాల్పులు – కుటుంబం శోకసంద్రం
ఉత్తర వెస్ట్‌బ్యాంక్‌లోని తుల్కరమ్ నగరానికి సమీపంలోని నూర్ షామ్స్ శరణార్థి శిబిరం ప్రాంతంలో ఇజ్రాయెల్ సైనిక దళాలు ఇటీవల దాడి జరిపాయి. ఈ ఘటనలో 23 ఏళ్ల గర్భిణి సోండొస్ జమాల్‌(IDF ఫైరింగ్‌లో) మరణించింది. వైద్యులు గర్భంలో ఉన్న శిశువును రక్షించేందుకు ప్రయత్నించినప్పటికీ విఫలమయ్యారు.
సోండొస్ భర్త కూడా ఈ కాల్పుల్లో తీవ్రంగా గాయపడినట్లు పాలస్తీనా ఆరోగ్య శాఖ వెల్లడించింది. ఈ ఘటన స్థానికంగా, అంతర్జాతీయ స్థాయిలో విమర్శలకు దారి తీసింది. ఇజ్రాయెల్ సైన్యం దీనిపై అధికారిక విచారణ చేపట్టనున్నట్లు ప్రకటించింది.
మరో యువతి మృతి – ఇజ్రాయెల్ వివరణ
అదే ప్రాంతంలో మరో దుర్ఘటన చోటుచేసుకుంది. 21 ఏళ్ల యువతి తన ఇంటి ముందు నిలుచునే ఉంటే, ఇజ్రాయెల్ సైన్యం అమర్చిన బాంబు పేలి ఆమె ప్రాణాలు కోల్పోయింది. అయితే, ఇజ్రాయెల్ ఆర్మీ దీనిపై వివరణ ఇచ్చింది.
ఆ ఇంట్లో ఓ మిలిటెంట్ ఉన్నాడని, అందుకే తలుపులు పేల్చివేసినట్లు పేర్కొంది. ఆ యువతిని ముందుగా హెచ్చరించినప్పటికీ, ఆమె అక్కడి నుంచి కదల్లేదని తెలిపింది. సాధారణ పౌరుల మరణం విచారకరమని ఇజ్రాయెల్ ఆర్మీ ఒక ప్రకటనలో వెల్లడించింది.
వెస్ట్‌బ్యాంక్‌లో మిలిటెంట్లపై ఇజ్రాయెల్ దాడులు
ఇజ్రాయెల్ సైన్యం వెస్ట్‌బ్యాంక్‌లో హమాస్, ఇతర మిలిటెంట్ గ్రూపులపై ప్రత్యేక ఆపరేషన్‌ నిర్వహిస్తోంది. గాజాలో కాల్పుల విరమణ అమల్లోకి వచ్చినప్పటికీ, వెస్ట్‌బ్యాంక్‌లో దాడులు కొనసాగుతూనే ఉన్నాయి.
అధికారిక నివేదికల ప్రకారం, గాజా యుద్ధం ప్రారంభమైనప్పటి నుంచి వెస్ట్‌బ్యాంక్, తూర్పు జెరూసలెంలో 905 మంది పాలస్తీనీయులు ప్రాణాలు కోల్పోయారు. వీరిలో చాలా మంది మిలిటెంట్లు అని ఇజ్రాయెల్ ప్రకటించినా, సాధారణ పౌరుల మరణాలు పెరుగుతున్నాయని స్థానిక వర్గాలు ఆరోపిస్తున్నాయి.
అంతర్జాతీయ విమర్శలు – ఇజ్రాయెల్‌పై ఒత్తిడి
ఇజ్రాయెల్ దాడుల్లో మహిళలు, చిన్నారులు కూడా ప్రాణాలు కోల్పోవడం ప్రపంచవ్యాప్తంగా తీవ్ర విమర్శలకు దారితీస్తోంది. మానవ హక్కుల సంస్థలు ఈ ఘటనలపై దృష్టి పెట్టాలని ఐక్యరాజ్యసమితి, అంతర్జాతీయ సమాజాన్ని కోరుతున్నాయి.
అటు పాలస్తీనా వర్గాలు, ఇటు ఇజ్రాయెల్ మిలిటరీ చర్యలపై వివిధ దేశాల నుంచి మిశ్రమ స్పందన వస్తోంది. శాంతి చర్చల వైఫల్యం, పెరుగుతున్న హింస ఈ ప్రాంతాన్ని మరింత అస్థిరతకు గురిచేస్తుందని విశ్లేషకులు అభిప్రాయపడుతున్నారు.