తాడేపల్లి: వైఎస్సార్సీపీ అధినేత జగన్ మోహన్ రెడ్డి మరోసారి కూటమి ప్రభుత్వాన్ని టార్గెట్ చేస్తూ తీవ్ర విమర్శలు గుప్పించారు.
తాడేపల్లిలో జరిగిన పార్టీ నేతల సమావేశంలో జగన్, ప్రభుత్వం ప్రజల నమ్మకాన్ని కోల్పోయిందని ఆగ్రహం వ్యక్తం చేశారు.
ప్రత్యేకంగా పథకాల అమలులో జరుగుతున్న లోపాలను ప్రస్తావిస్తూ, ప్రజలు తీవ్రమైన ఇబ్బందులు ఎదుర్కొంటున్నారని ఆరోపించారు.
ఫీజు రీయింబర్స్‌మెంట్, వసతి దీవెన వంటి పథకాల బకాయిలను ప్రభుత్వం వెంటనే చెల్లించాలని డిమాండ్ చేశారు. ఆరోగ్యశ్రీ చెల్లింపులు తొమ్మిది నెలలుగా నిలిచిపోయాయని, 104, 108 సిబ్బందికి జీతాలు ఇవ్వకపోవడం దారుణమన్నారు.
వ్యవస్థలు పూర్తిగా నిర్వీర్యం కావడంతో ప్రజలు తీవ్రమైన ఇబ్బందులు ఎదుర్కొంటున్నారని అభిప్రాయపడ్డారు.
రైతుల సమస్యలపై జగన్ తీవ్ర ఆందోళన వ్యక్తం చేశారు. వర్షాలతో నష్టపోయిన రైతుల కోసం ఎలాంటి సహాయం చేయకుండా ప్రభుత్వం కనీసం స్పందించలేదని మండిపడ్డారు.
కరెంటు ఛార్జీల పెంపు, ఇసుక ధరల పెరుగుదల ప్రజలపై భారమైందని తెలిపారు. మద్యం షాపుల వ్యవస్థపై కూడా జగన్ తీవ్ర విమర్శలు చేశారు. బెల్టు షాపుల ద్వారా ప్రభుత్వంపై అవినీతి ఆరోపణలు ముదిరాయని చెప్పారు.
జిల్లాల నాయకులు ఈ అంశాలను ప్రజల్లోకి తీసుకెళ్లి, ప్రభుత్వ వైఫల్యాలను ఎండగట్టాలని జగన్ పిలుపునిచ్చారు.