అమరావతి: పోలీసులపై జగన్ వ్యాఖ్యలు బాధ్యతారాహిత్యం: పురందేశ్వరి
రాప్తాడులో జగన్ వ్యాఖ్యలపై తీవ్ర ప్రతిస్పందన
ఆంధ్రప్రదేశ్ మాజీ ముఖ్యమంత్రి, వైఎస్సార్ కాంగ్రెస్ పార్టీ అధ్యక్షుడు వైఎస్ జగన్‌మోహన్ రెడ్డి (Y. S. Jagan Mohan Reddy) ఇటీవల రాప్తాడు (Raptadu) నియోజకవర్గం రామగిరి (Ramagiri)లో చేసిన వ్యాఖ్యలు వివాదాస్పదంగా మారాయి. పోలీసులపై ఆయన గుడ్డలు ఊడదీయిస్తానంటూ చేసిన వ్యాఖ్యలపై పెద్ద ఎత్తున విమర్శలు వెల్లువెత్తుతున్నాయి.
అధికారుల సంఘం ఆగ్రహం
జగన్ చేసిన వ్యాఖ్యలపై ఆంధ్రప్రదేశ్ పోలీసు అధికారుల సంఘం (AP Police Officers’ Association) గట్టిగా స్పందించింది. పోలీసుల పరువు తీసే విధంగా ఉన్న వ్యాఖ్యలను తీవ్రంగా ఖండించిన సంఘం, జగన్ వెంటనే క్షమాపణ చెప్పాలని డిమాండ్ చేసింది. అంతేకాక, అవసరమైతే న్యాయపరమైన పోరాటానికి వెనుకాడబోమని స్పష్టం చేసింది.
మహిళా ఎస్పీని లక్ష్యంగా చేసుకున్నారని విమర్శ
ఈ వ్యాఖ్యల నేపథ్యంలో ఏపీ బీజేపీ అధ్యక్షురాలు దగ్గుబాటి పురందేశ్వరి (Daggubati Purandeswari) స్పందించారు. శ్రీ సత్యసాయి జిల్లా ఎస్పీ మహిళ అనే విషయాన్ని పరిగణించకుండా జగన్ వ్యాఖ్యలు చేయడం అనేది అయన బాధ్యతారాహిత్యమని ఆమె విమర్శించారు. పోలీసు శాఖలో దాదాపు 5 వేల మంది మహిళలు సేవలందిస్తున్నారని, వారిని కించపరిచేలా జగన్ మాటలు ఉన్నాయని పురందేశ్వరి అభిప్రాయపడ్డారు.
పోలీసుల గౌరవానికి భంగం
పోలీసు వ్యవస్థను నాలుగో సింహంగా భావించే భారత ప్రజాస్వామ్యంలో, ఇలాంటి వ్యాఖ్యలు బాధాకరమని పురందేశ్వరి అన్నారు. ముఖ్యమంత్రి పదవిని అలంకరించిన వ్యక్తిగా జగన్ మరింత బాధ్యతతో మాట్లాడాల్సిందిగా ఆమె సూచించారు. పోలీసు వ్యవస్థను అపహాస్యం చేయడం సరికాదని, వెంటనే జగన్ క్షమాపణ చెప్పాలని ఆమె డిమాండ్ చేశారు.