తిరుమల: తిరుమల లడ్డూ కల్తీ వ్యవహారం తీవ్ర చర్చనీయాంశంగా మారిన తరుణంలో, తమిళ హీరో కార్తి చేసిన ఓ కామెంట్ వివాదాస్పదమైంది. ఈ వ్యాఖ్యపై ఆంధ్రప్రదేశ్ డిప్యూటీ సీఎం పవన్ కల్యాణ్ పరోక్షంగా స్పందించి, తన ఆగ్రహాన్ని వ్యక్తం చేశారు. తిరుమల లడ్డూ ప్రసాదం వంటి సెన్సిటివ్ అంశాలపై జోకులు వేయడం సరికాదని, అలాంటి విషయాలు మాట్లాడే ముందు వందసార్లు ఆలోచించాలని ఆయన అన్నారు.
ఈ ఘటనపై కార్తి వెంటనే స్పందిస్తూ, క్షమాపణలు చెప్పాడు. ‘‘పవన్ కల్యాణ్ గారిపై నేను పూర్తి గౌరవంతో ఉన్నాను. నా మాటలు అపార్థానికి దారి తీసినందుకు నిజంగా క్షమాపణలు చెబుతున్నాను. వేంకటేశ్వర స్వామి అంటే నాకు చాలా భక్తి ఉంది. మన సంప్రదాయాలను గౌరవించడంలో నేను ఎప్పుడూ ముందుంటాను,’’ అని కార్తి తన ట్విట్టర్‌లో తెలిపాడు.
సెన్సిటివ్ టాపిక్ పై కామెంట్:
సత్యం సుందరం ప్రీ-రిలీజ్ ఈవెంట్‌లో కార్తి చేసిన వ్యాఖ్యలు వివాదానికి దారితీశాయి. ఈ ఈవెంట్‌లో యాంకర్ కొన్ని మీమ్స్ చూపిస్తూ కార్తి నుంచి స్పందన కోరారు. ఇందులో “లడ్డూ కావాలా నయా” అనే డైలాగ్‌ చూపించారు. దీనిపై కార్తి, ‘‘ఇప్పుడు లడ్డూ గురించి మాట్లాడకూడదు. అది సెన్సిటివ్ టాపిక్. మనకు అది అవసరం లేదు,’’ అంటూ వ్యాఖ్యానించాడు.
ఆ వెంటనే, పవన్ కల్యాణ్ ఈ అంశంపై తీవ్ర ఆగ్రహం వ్యక్తం చేశారు. ‘‘తిరుమల లడ్డూ వంటి సెన్సిటివ్ విషయంపై జోకులు వేయడం సరికాదు. మన సంప్రదాయాలను గౌరవించే నటులుగా, ప్రతి మాట మాట్లాడేముందు వందసార్లు ఆలోచించాలని అవసరం ఉంది,’’ అంటూ పవన్ అన్నారు.
ఈ పరిణామాల నేపథ్యంలో, కార్తి చేసిన వ్యాఖ్యలపై పెద్ద వివాదం రాకముందే తక్షణమే క్షమాపణలు చెప్పడం గమనార్హం.