ఢిల్లీ: ఖలిస్తాన్ వేర్పాటువాదంపై భారత్-అమెరికా మధ్య తీవ్ర చర్చలు జరుగుతున్నాయి. భారత రక్షణ మంత్రి రాజ్‌నాథ్ సింగ్, అమెరికా నేషనల్ ఇంటెలిజెన్స్ డైరెక్టర్ తుల్సి గబ్బార్డ్‌తో భేటీ అయ్యి సిక్స్ ఫర్ జస్టిస్ (SFJ) గ్రూపుపై కఠిన చర్యలు తీసుకోవాలని కోరారు.
భారత భద్రతకు ముప్పుగా మారిన ఈ సంస్థ అమెరికాలో కార్యకలాపాలు నిర్వహిస్తోందని, SFJ ప్రధాన నాయకుడు గురుపత్వంత్ సింగ్ పన్నున్‌పై ఉగ్రవాద చట్టాల ప్రకారం చర్యలు తీసుకోవాలని భారత్ ముక్తకంఠంతో పేర్కొంది.
ఈ వివాదానికి 2023లో మొదలైన అమెరికా కేసు ప్రధాన కారణంగా మారింది. భారతీయ పౌరుడు నిఖిల్ గుప్తాపై, SFJ నేత పన్నున్ హత్య కుట్రకు పాల్పడ్డారనే ఆరోపణలు రావడంతో, ఈ వ్యవహారం అంతర్జాతీయంగా చర్చనీయాంశంగా మారింది. భారత్ దీనిని తీవ్రంగా పరిగణించగా, అమెరికా ఈ కేసును దౌత్య ఒత్తిడిగా ఉపయోగించుకుంటోందని విశ్లేషకులు భావిస్తున్నారు.
అమెరికా భారత్ దృష్టిని అర్థం చేసుకున్నా, ఖలిస్తానీ మద్దతుదారులు ప్రభావం చూపుతున్న కెనడా, బ్రిటన్ వంటి దేశాలకు అనుకూలంగా వ్యవహరిస్తుందా? లేక భారత్ ఒత్తిడికి లోనై SFJపై కఠిన చర్యలు తీసుకుంటుందా? అన్నది ఆసక్తికరంగా మారింది. ఈ వ్యవహారం భారత్-అమెరికా రక్షణ సంబంధాలపై ఎలాంటి ప్రభావం చూపుతుందన్నది వేచిచూడాల్సిన అంశం.
ఈ భేటీ అనంతరం, భద్రతా సహకారం పెంపొందించే దిశగా భారత్-అమెరికా మధ్య చర్చలు జరిగాయి. భారత జాతీయ భద్రతా సలహాదారు అజిత్ ధోవల్ కూడా గబ్బార్డ్‌తో భేటీ అయ్యారు. భారత్ తన భద్రతా ప్రయోజనాలను కాపాడుకునేందుకు అన్ని మార్గాల్లో ఒత్తిడి తెస్తోంది.
అమెరికా నిజంగా SFJపై కఠిన చర్యలు తీసుకుంటుందా లేక వ్యూహాత్మక మౌనం పాటించనుందా అన్నది త్వరలో తేలనుంది.