ఆంధ్రప్రదేశ్: కొడాలి నాని అనారోగ్యం – హైదరాబాద్ AIGలో చికిత్స
తీవ్ర అనారోగ్యంతో ఆస్పత్రిలో చేరిన కొడాలి నాని
ఆంధ్రప్రదేశ్ మాజీ మంత్రి కొడాలి నాని (Kodali Nani) అనారోగ్యంతో హైదరాబాద్‌లోని AIG ఆస్పత్రిలో (AIG Hospital) చేరారు.
ప్రత్యేక వైద్యుల బృందం ఆయనకు చికిత్స అందిస్తుండగా, గత కొంతకాలంగా ఆయన ఆరోగ్య సమస్యలతో బాధపడుతున్నట్లు తెలుస్తోంది.
ఎన్నికల తర్వాత ప్రజా జీవితానికి దూరంగా
ఏపీ అసెంబ్లీ ఎన్నికల తర్వాత కొడాలి నాని పెద్దగా ప్రజా జీవితంలో కనిపించలేదు.
చివరిసారిగా వైఎస్ జగన్ మోహన్ రెడ్డి (Jagan Mohan Reddy) గుంటూరు పర్యటనలో పాల్గొన్నారు. ఆ తర్వాత నుంచి ఆయన రాజకీయంగా పెద్దగా యాక్టివ్‌గా లేరు.
గతంలోనూ అనారోగ్య సమస్యలు
కొడాలి నాని గత రెండేళ్లుగా ఆరోగ్య సమస్యలతో బాధపడుతున్నారని సమాచారం.
వైఎస్ జగన్ ప్రభుత్వం అధికారంలో ఉన్నప్పుడు కూడా ఆయన హైదరాబాద్‌లోని AIG ఆస్పత్రి, క్యాన్సర్ హాస్పిటల్‌లో చికిత్స పొందారు. గత రెండు నెలలుగా ఆరోగ్యం మరింత క్షీణించిందని తెలుస్తోంది.
గుండెపోటు వచ్చినట్టు ప్రచారం
నిన్న అర్ధరాత్రి సమయంలో తీవ్ర అనారోగ్యం కారణంగా కుటుంబసభ్యులు ఆయన్ను హుటాహుటిన ఆస్పత్రికి తరలించారు. కొడాలి నానికి గుండెపోటు వచ్చిందని సోషల్ మీడియాలో ప్రచారం జరిగినప్పటికీ, ఆయన సన్నిహితులు దీనిని ఖండించారు.
కేవలం గ్యాస్ ట్రబుల్ కారణంగా ఆస్పత్రిలో చేరారని, ఉద్దేశపూర్వకంగా దుష్ప్రచారం చేస్తున్నారని మండిపడ్డారు.
రాజకీయ వర్గాల్లో చర్చనీయాంశం
గుడివాడ (Gudivada) నియోజకవర్గానికి చెందిన కొడాలి నాని, గతంలో వైఎస్ జగన్ క్యాబినెట్‌లో మంత్రిగా పనిచేశారు. అయితే ఇటీవల అనారోగ్య సమస్యల కారణంగా రాజకీయాలకు దూరంగా ఉంటున్నారని సోషల్ మీడియాలో అనేక కథనాలు వెలువడ్డాయి.
కుటుంబ సభ్యుల నుండి అధికారిక ప్రకటన లేదు
ప్రస్తుతం కొడాలి నాని ఆరోగ్య పరిస్థితిపై వైద్యులు గానీ, కుటుంబ సభ్యులు గానీ అధికారిక ప్రకటన చేయలేదు. ఆస్పత్రి వర్గాలు త్వరలోనే ఆయన ఆరోగ్యంపై క్లారిటీ ఇచ్చే అవకాశం ఉంది.