లగచర్ల వికారాబాద్: లగచర్లలో జిల్లా కలెక్టర్‌తో పాటు అధికారులపై దాడి ఘటనపై పోలీసులు పెద్దఎత్తున చర్యలు తీసుకున్నారు. ఈ దాడి నేప‌థ్యంలో అర్ధరాత్రి 300 మందికి పైగా పోలీసుల బ‌ల‌గాలను పంపించి, కరెంటు తీసేసి ప్రతి ఇంటిని జల్లడపట్టారు.
అనుమానితులుగా భావించిన 30 మందిని అదుపులోకి తీసుకున్నారు. ఈ చర్యలపై బీఆర్ఎస్ పార్టీ వర్కింగ్ ప్రెసిడెంట్, మాజీ మంత్రి కేటీఆర్ ట్విట్టర్ వేదికగా స్పందించారు.
కేటీఆర్ కాంగ్రెస్ ప్రభుత్వంపై ఆగ్రహం వ్యక్తం చేస్తూ, ‘‘రైతుల భూములను ఫార్మా కంపెనీల కోసం లాక్కోవద్దని అన్నదాతలు కోరితే అరెస్టులు చేస్తున్నారా? రైతుల పట్ల ఈ విధంగా ప్రవర్తించడం న్యాయమా?’’ అని ప్రశ్నించారు.
‘‘రాత్రి వేళ రైతులను అరెస్ట్ చేసి బెదిరింపులతో భయపెట్టాలని ప్రభుత్వం చూస్తోంది. ఇదేనా రైతు సంక్షేమ పాలన? ప్రజాస్వామ్య పాలనలో రైతులు తమ సమస్యలు చెప్పుకోవడమే తప్పా?’’ అంటూ మండిపడ్డారు.
లగచర్ల గ్రామస్తుల నిరసనకు బీఆర్ఎస్ అండగా ఉంటుందని కేటీఆర్ హామీ ఇచ్చారు. ‘‘రైతులు తమ పొలాలను రక్షించుకోవాలని ప్రయత్నిస్తే అరెస్టులు చేయడం సరైంది కాదు. వారి పోరాటాన్ని మేము పూర్తిగా మద్దతిస్తున్నాం,’’ అని కేటీఆర్ పేర్కొన్నారు.