వికారాబాద్: లగచర్ల ఘటనలో మాజీ ఎమ్మెల్యే పట్నం నరేందర్ రెడ్డి, నిందితుడు సురేశ్‌తో 42 సార్లు ఫోన్‌లో మాట్లాడినట్లుగా, అలాగే బీఆర్ఎస్ వర్కింగ్ ప్రెసిడెంట్ కేటీఆర్‌తోనూ చర్చలు జరిపినట్లు ఫోన్ రికార్డింగ్ ఉందని మంత్రి కోమటిరెడ్డి వెంకటరెడ్డి సంచలన వ్యాఖ్యలు చేశారు.
ఈ ఘటన వెనుక ఎంత పెద్దవాళ్లైనా ఉన్నా ఉపేక్షించేది లేదని స్పష్టం చేశారు. నల్గొండ జిల్లాలో పర్యటనలో ఉన్న ఆయన మీడియాతో మాట్లాడుతూ, బీఆర్ఎస్ నేతలు తప్పుడు చర్యలకు మద్దతు ఇవ్వడం విడ్డూరంగా ఉందని అన్నారు.
భూసేకరణకు సంబంధించి గతంలో ఎస్సీల భూములు లాక్కునే సమయంలో ఈ తరహా దాడులు జరగలేదని పేర్కొన్నారు. మల్లన్న సాగర్ సహా పలు ప్రాజెక్టులకు భూసేకరణ జరగినప్పుడు తమ పార్టీ అడ్డుకుంటే అవి పూర్తయ్యేవా? అని ప్రశ్నించారు.
బీఆర్ఎస్ నాయకత్వం ప్రజలను తప్పుదారి పట్టిస్తే, దాడులకు పాల్పడితే పీడీ యాక్ట్ కింద కఠిన చర్యలు తీసుకుంటామని హెచ్చరించారు.
వికారాబాద్ కలెక్టర్‌పై దాడి చేసిన వారిపై చట్టపరంగా తప్పకుండా చర్యలు తీసుకుంటామని ఆయన స్పష్టం చేశారు. మున్సిపల్ మంత్రి ఆదేశాలతోనే అభిప్రాయ సేకరణ కార్యక్రమం జరిగిందని వెల్లడించారు.
ఈ ఘటనలో కాల్ డేటా, వాట్సాప్ కాల్ రికార్డులను పరిశీలిస్తున్నట్లు తెలిపారు. ధాన్యం కొనుగోలు ప్రక్రియలో ఆలస్యం జరిగినప్పటికీ, వారం రోజుల్లో పూర్తి చేయనున్నామని ధృవీకరించారు.