కామెడీ సినిమాలకు సరైన టైమింగ్‌లో విడుదల అయితే, భారీ విజయం సాధించడం ఖాయం. ఇప్పుడు ‘మ్యాడ్ స్క్వేర్’ కూడా అలాంటి స్థితిలోనే ఉంది. ‘మ్యాడ్’ సూపర్ హిట్ అయిన తర్వాత, ఈ సీక్వెల్‌పై అంచనాలు పెరిగాయి.
వేసవి సెలవుల్లో మార్చి 28 విడుదలవుతున్న ఈ సినిమా, ఫ్యామిలీ ఆడియన్స్‌కు పూర్తిగా సరిపోయే ఎంటర్‌టైనర్‌గా రూపొందినట్లు టీజర్, పాటలు చెబుతున్నాయి. ముఖ్యంగా ‘లడ్డూ గాని పెళ్లి’ పాట సోషల్ మీడియాలో వైరల్ కావడం, సినిమాపై మరింత హైప్ తెచ్చింది.
సినిమా రన్ టైమ్ కూడా పరిపూర్ణమైన కామెడీ ఎంటర్‌టైన్‌మెంట్‌కు తగ్గట్లు 2 గంటల 7 నిమిషాలు మాత్రమే ఉంది. కామెడీ డ్రామాగా ప్రేక్షకులను పూర్తిగా ఆకట్టుకునేలా దర్శకుడు కళ్యాణ్ శంకర్ ట్రిమ్ చేశారని సమాచారం. మాస్, క్లాస్ ప్రేక్షకులందరికీ వినోదాన్ని అందించేలా ప్లాన్ చేసిన ఈ చిత్రం, వేసవిలో థియేటర్లలో నవ్వుల పండుగను సృష్టించనుంది.
ఈ సినిమా ‘రాబిన్‌హుడ్’తో ఒకే రోజు విడుదలవుతున్నా, రెండింటి టార్గెట్ ఆడియెన్స్ వేరుగా ఉండడం వల్ల పెద్దగా పోటీ ఉండదని ట్రేడ్ వర్గాలు భావిస్తున్నాయి. తక్కువ టికెట్ ధరలో విడుదలైతే, ‘మ్యాడ్’ మాదిరిగానే ‘మ్యాడ్ స్క్వేర్’ కూడా భారీ కలెక్షన్లు రాబట్టే అవకాశం ఉంది.
క్లాస్ కామెడీ, సరైన టైమింగ్, హిట్ ఫ్రాంచైజీ – ఈ అన్ని అంశాలు కలిసొచ్చిన ఈ చిత్రం, వేసవి బ్లాక్‌బస్టర్‌గా నిలిచే అవకాశముందని అంచనా వేస్తున్నారు. మరి ‘మ్యాడ్ స్క్వేర్’ ప్రేక్షకుల అంచనాలను ఎంతవరకు నిలబెడుతుందో వేచి చూడాలి.