మూవీడెస్క్: మంచు విష్ణు అత్యంత ప్రతిష్టాత్మకంగా తీసుకువస్తున్న భారీ బడ్జెట్ సినిమా కన్నప్ప విడుదల ఆలస్యమవుతోంది.
దాదాపు 100 కోట్లకు పైగా బడ్జెట్ తో నిర్మితమవుతున్న ఈ చిత్రంలో బాలీవుడ్ స్టార్ అక్షయ్ కుమార్ నటిస్తున్నారు.
అలాగే మలయాళ సీనియర్ హీరో మోహన్ లాల్, ప్రభాస్ వంటి ప్రముఖులు ప్రత్యేక పాత్రల్లో నటించడం సినిమాకి పాన్ ఇండియా స్థాయిలో క్రేజ్ తీసుకొచ్చింది.
అక్షయ్ శివుడి పాత్రలో, ప్రభాస్ నందీశ్వరుడిగా కనిపించనున్నారు.
ఇప్పటికే ఈ సినిమా షూటింగ్ తుది దశకు చేరుకున్నప్పటికీ, మొదట డిసెంబర్ క్రిస్మస్ సీజన్ లో రిలీజ్ చేయాలని అనుకున్న ప్లాన్ ను వాయిదా వేస్తున్నట్లు మంచు విష్ణు స్వయంగా ప్రకటించారు.
తిరుపతి దర్శనం అనంతరం మీడియాతో మాట్లాడుతూ, ఈ సినిమాను సమ్మర్ సీజన్ లో విడుదల చేయాలనుకుంటున్నామని ఆయన క్లారిటీ ఇచ్చారు.
తాజాగా ప్రభాస్ లుక్ లీక్ కావడంతో చిత్రబృందం సీరియస్ అయింది. ఈ లీక్ వెనుక ఉన్న వ్యక్తిని అదుపులోకి తీసుకున్నారని చిత్ర యూనిట్ వెల్లడించింది.
మంచి విష్ణు సోషల్ మీడియా ద్వారా స్పందిస్తూ, ఈ లీక్ బాధాకరమని, త్వరలోనే మరిన్ని అప్డేట్స్ అందజేస్తామన్నారు.