తెలంగాణ: ఎమ్మెల్సీ ఎన్నికల ప్రచారంలో కేంద్ర సహాయ మంత్రి బండి సంజయ్ కీలక వ్యాఖ్యలు చేశారు. సర్వేల ప్రకారం కాంగ్రెస్ పార్టీకి మూడో స్థానం తప్పదని, ఎన్నికల ఫలితాలు ఆ పార్టీకి చేదు అనుభవం ఇస్తాయని ఆయన తెలిపారు.
ముఖ్యమంత్రి రేవంత్ రెడ్డి ఎన్నికల్లో గెలిచినా, ఓడినా ఎలాంటి నష్టమేమీ లేదని చెప్పడంపై బండి సంజయ్ ఆశ్చర్యం వ్యక్తం చేశారు. ఓటమి భయమే రేవంత్ ప్రచారంలోకి రావడానికి కారణమని ఆయన అన్నారు.
గత ప్రభుత్వంలో జరిగిన అక్రమాలపై సీఎం కేంద్రాన్ని నిలదీయడం విడ్డూరంగా ఉందని, నిజంగా నిష్పక్షపాతంగా ఉండాలంటే ఆ కేసులను సీబీఐకు అప్పగించాలని బండి సంజయ్ డిమాండ్ చేశారు.
కాంగ్రెస్, బీఆర్‌ఎస్ మధ్య చీకటి ఒప్పందాలు ఉన్నాయని ఆరోపించిన ఆయన, అవినీతి కేసుల్లో దోషులు బయటపడే వరకు బీజేపీ నిష్క్రియంగా ఉండబోదని స్పష్టం చేశారు.
ఈ ఎన్నికల ఫలితాలు తెలంగాణ రాజకీయాల్లో కీలక మార్పులకు దారితీస్తాయని బండి సంజయ్ అభిప్రాయపడ్డారు.