ఢాకా: బంగ్లాదేశ్ లో విద్యార్థులు, నిరుద్యోగుల ఆందోళనలు పలు హింసాత్మక ఘటనలకు దారితీశాయి. ఈ నేపథ్యంలో షేక్ హసీనా బంగ్లాదేశ్ లో కర్ఫ్యూ దేశవ్యాప్తంగా విధించింది.
కాగా, ఈ తీవ్రమైన ఆందోళనలను పోలీసులు అదుపు చేయడంలో విఫలం అవడంతో ప్రభుత్వం మిలటరీని కూడా రంగంలోకి దింపింది. ఇదిలా ఉండగా, ఆందోళనల్లో ఇప్పటి వరకు 105 మంది తమ ప్రాణాలను కోల్పోయారు.
అయితే, కేవలం రాజధానిలోనే 52 మంది మృతి చెందడం జరిగింది. ఈ మరణాల్లో ఎక్కువ శాతం పోలీసుల కాల్పుల్లో జరిగినవేనని తెలుస్తోంది.
పరిస్థితిని చక్కదిడ్డానికి అలాగే అనవసర ప్రచారాన్ని అడ్డుకోవడానికి రాజధాని ఢాకాలో ఇంటర్నెట్‌ను నిలిపివేశారు.
అయితే, ప్రభుత్వం ఎన్ని నిషేధాలు విధించినా తాము మాత్రం తమ ఆందోళన కొనసాగిస్తామని విద్యార్థులు తెగేసి చెబుతున్నారు.
ఈ ఘటన వల్ల జరిగిన మరణాలకు ప్రధాని షేక్ హసీనానే బాధ్యత వహించి వెంటనే తన పదవికి రాజీనామా చేయాలని వారూ డిమాండ్ చేస్తున్నారు.
బంగ్లాదేశ్ లో కర్ఫ్యూ కారణం:
పాకిస్థాన్‌తో 1971లో స్వతంత్ర దేశం కోసం జరిగిన విముక్తి యుద్ధంలో పాల్గొన్న వారి పిల్లలు మరియు ఇతర సమూహాలకు సివిల్ సర్వీస్ పోస్టుల్లో సగానికిపైగా ఇచ్చిన రిజర్వేషన్ల కోటా వ్యవస్థను ముగించాలని ఈ నెలలో విద్యార్థులు, నిరుద్యోగులు ఆందోళనలకు పిలుపునిచ్చారు.
అయితే ఈ రిజర్వేషన్ కోటా వల్ల ప్రధాని హసీనాకు మద్దతుని అందించే ప్రభుత్వ అనుకూల సమూహాల పిల్లలకే ఈ పథకం నుంచి లబ్ధి పొందుతున్నారని విద్యార్థి, ఉద్యోగ సంఘాలు విమర్శిస్తున్నాయి.