అమరావతి: ఆంధ్రప్రదేశ్‌ రాష్ట్రంలో కొత్త మద్యం పాలసీ అమల్లోకి రానుంది. ఈ కొత్త విధానంలో మద్యం షాపుల లైసెన్సుల కేటాయింపు ప్రక్రియ నేటి నుండి ప్రారంభమైంది. రాష్ట్రవ్యాప్తంగా 3,396 మద్యం షాపులకు నోటిఫికేషన్ విడుదల చేసిన ప్రభుత్వం, ఈ షాపులను రెండేళ్ల కాలపరిమితితో ప్రైవేట్ వారికి కేటాయించనుంది. అంతేకాదు, ఈ నెల 12 నుండి లైసెన్సుదారులు తమ షాపులను ప్రారంభించవచ్చు.
దరఖాస్తు ప్రక్రియ
రాష్ట్రవ్యాప్తంగా కొత్తగా జారీచేయబోయే మద్యం షాపులకు దరఖాస్తులు ఈరోజు నుండి స్వీకరించబడుతున్నాయి. ఆన్‌లైన్‌ మరియు ఆఫ్‌లైన్‌ ద్వారా దరఖాస్తులు చేయడానికి వీలుంది. ఒక్కో దరఖాస్తుకు రూ.2 లక్షలు నాన్‌-రిఫండబుల్‌ రుసుము చెల్లించాలి. దరఖాస్తుల సమర్పణకు ఈ నెల 9 వరకు గడువు ఉంది, లాటరీ ప్రక్రియ ఈ నెల 11న జరుగుతుంది.
లైసెన్సు ఫీజులు
మద్యం షాపుల లైసెన్సు రుసుములు, షాపు ఉండే ప్రాంతంలోని జనాభా ఆధారంగా నిర్ణయించారు. 10 వేల జనాభా వరకు ఉన్న ప్రాంతాల్లో లైసెన్సు ఫీజు రూ.50 లక్షలు కాగా, 5 లక్షల మందికి పైగా ఉన్న నగరాల్లో రూ.85 లక్షల వరకు ఉంటుంది. లైసెన్సుదారులకు వ్యాపార మార్జిన్‌ 20% వరకు ఉంటుందని ప్రభుత్వం ప్రకటించింది.
ప్రీమియం స్టోర్లు
ఈసారి అదనంగా 12 ప్రీమియం మద్యం స్టోర్లు కూడా ఏర్పాటు చేయనున్నారు. విజయవాడ, గుంటూరు, విశాఖపట్నం, రాజమహేంద్రవరం, కాకినాడ, నెల్లూరు, కర్నూలు, కడప, అనంతపురం నగరాల్లో ఈ స్టోర్లు ఐదేళ్ల కాలపరిమితితో లైసెన్సులు పొందనున్నాయి. ఈ స్టోర్లకు లైసెన్సు రుసుము ఏడాదికి రూ. కోటి ఉండనుంది.
మద్యం ధరలు తగ్గింపు
రాష్ట్రంలో మందుబాబులకు ఇది నిజంగా పండగే! ఇప్పుడు కేవలం రూ.99కే క్వార్టర్ మద్యం లభించనుంది. ఈ నిర్ణయంతో మద్యం ధరలు గణనీయంగా తగ్గనున్నాయి.
ప్రత్యేక కేటాయింపులు
ప్రభుత్వం గీత కార్మికుల విభాగానికి చెందిన 6 కులాలకు ప్రత్యేకంగా 340 మద్యం షాపులను కేటాయించనుంది. ఈ కేటాయింపులపై త్వరలో మరింత స్పష్టత వచ్చే అవకాశం ఉంది. అలాగే, తిరుపతి నగరంలో రైల్వే స్టేషన్ నుంచి అలిపిరి వరకు ఉన్న ప్రాంతాల్లో మద్యం షాపుల ఏర్పాటు నిషేధించబడింది.