టాలీవుడ్ యంగ్ హీరో నితిన్ ప్రస్తుతం ‘రాబిన్ హుడ్’ సినిమాతో తన కెరీర్‌ను తిరిగి గాడిలో పెట్టేందుకు ప్రయత్నిస్తున్నాడు. గత కొన్నేళ్లుగా వరుస ఫ్లాప్స్‌తో మార్కెట్ పడిపోయిన ఆయనకు, ఈ సినిమా కీలకమైనదిగా మారింది. 2020లో భీష్మ సూపర్ హిట్ అయిన తర్వాత, ఆయన చేసిన సినిమాలన్నీ నిరాశే మిగిల్చాయి.
ముఖ్యంగా ఎక్స్ ట్రా ఆర్డినరీ మ్యాన్ లాంటి సినిమా బాక్సాఫీస్ వద్ద కనీసం 10 కోట్లను కూడా దాటలేకపోవడం అందరినీ ఆశ్చర్యపరిచింది.
ఈ నేపథ్యంలో, నితిన్—వెంకీ కుడుముల హిట్ కాంబినేషన్‌లో వస్తున్న ‘రాబిన్ హుడ్’పై మంచి అంచనాలున్నాయి. గతంలో వీరి కాంబోలో వచ్చిన భీష్మ ఘన విజయం సాధించడంతో, మళ్లీ అదే మ్యాజిక్ రిపీట్ అవుతుందా? అన్నది ఆసక్తిగా మారింది.
మైత్రి మూవీ మేకర్స్ భారీ బడ్జెట్‌తో నిర్మిస్తున్న ఈ సినిమా కనీసం 30 కోట్ల షేర్‌ను టార్గెట్‌గా పెట్టుకుని విడుదల కానుంది. కానీ, గత రెండు సంవత్సరాల్లో నితిన్ సినిమాలకు వచ్చిన కలెక్షన్లను పరిశీలిస్తే, ఈ మార్క్ అందుకోవడం అంత ఈజీ కాదు.
ఇప్పటివరకు విడుదలైన టీజర్, పాటలు మిక్స్‌డ్ రెస్పాన్స్‌ను తెచ్చుకున్నాయి. అయితే, సినిమా ఓ ఫన్నీ యాక్షన్ ఎంటర్‌టైనర్‌గా ఉంటుందని మేకర్స్ చెబుతున్నారు. కానీ, అదే సమయానికి మ్యాడ్ స్క్వేర్ వంటి చిత్రం బాక్సాఫీస్‌పై పోటీ ఇవ్వనుండటంతో, ‘రాబిన్ హుడ్’ వసూళ్లపై ప్రభావం పడే అవకాశం ఉంది.