ఒక్కరోజు కాలేదు.. అప్పుడేనా?: దిల్లీ సీఎం రేఖా గుప్తా

జాతీయం: ఒక్కరోజు కాలేదు.. అప్పుడేనా?: దిల్లీ సీఎం రేఖా గుప్తా

దిల్లీలో కొత్త ప్రభుత్వం ఏర్పడి మరుక్షణం కూడా కాకముందే ప్రతిపక్షం నుంచి విమర్శలు రావడం పై ముఖ్యమంత్రి రేఖా గుప్తా తీవ్రంగా స్పందించారు. భాజపా ఎన్నికల హామీలను నిలబెట్టలేదంటూ ఆమ్ ఆద్మీ పార్టీ నేత ఆతిశీ చేసిన వ్యాఖ్యలను ఆమె ఖండించారు.

రేఖా గుప్తా మాట్లాడుతూ, “కాంగ్రెస్ 15 ఏళ్లు, ఆప్ 13 ఏళ్లు దిల్లీని పాలించాయి. ఇన్నేళ్లపాటు చేసిందేమీ లేకుండా, మేము అధికారంలోకి వచ్చి ఒక్కరోజు కూడా గడవకముందే విమర్శలు చేయడం ఎంతవరకు సమంజసం? మేము బాధ్యతలు స్వీకరించిన వెంటనే క్యాబినెట్ సమావేశం నిర్వహించాం. ప్రధాన మంత్రి మోదీ నాయకత్వంలో దిల్లీ తన హక్కులన్నీ పొందుతుంది” అని స్పష్టం చేశారు.

ఆయుష్మాన్ భారత్ పథకాన్ని అందుబాటులోకి తెచ్చిన తమ ప్రభుత్వాన్ని విమర్శించే హక్కు ఆప్‌కు లేదని ఆమె వ్యాఖ్యానించారు. “ఈ పథకాన్ని గత ప్రభుత్వాలు ఎందుకు అమలు చేయలేదు? ప్రజలకు రూ.10 లక్షల మేర వైద్యసహాయం అందించే ఈ పథకాన్ని తాము మొదటిరోజే అమలు చేశామని” తెలిపారు.

దిల్లీలో మహిళలకు నెలకు రూ.2,500 ఆర్థిక సహాయం అందించడంపై తొలిసారి స్పందించిన సీఎం, “అర్హులైన మహిళల బ్యాంకు ఖాతాల్లో మార్చి 8 నాటికి ఈ సాయం జమ అవుతుంది. ప్రభుత్వం ఏర్పడిన వెంటనే ప్రతిపక్షం విమర్శలు చేయడం రాజకీయం మాత్రమే” అని పేర్కొన్నారు.

ఆమ్ ఆద్మీ పార్టీ నేత ఆతిశీ, “భాజపా తమ తొలి క్యాబినెట్ సమావేశంలోనే మహిళలకు ఆర్థికసహాయం అందించే హామీని ఉల్లంఘించింది” అంటూ విమర్శలు చేశారు. దీనిపై సీఎం రేఖా గుప్తా స్పష్టమైన సమాధానం ఇచ్చారు.

దిల్లీ ప్రభుత్వానికి సంబంధించిన 14 పెండింగ్ కాగ్ రిపోర్టులను అసెంబ్లీ తొలి సమావేశాల్లోనే ప్రవేశపెట్టేలా చర్యలు తీసుకుంటామని సీఎం వెల్లడించారు. గత ప్రభుత్వ పాలనలో జరిగిన అన్ని విషయాలను ప్రజల ముందు ఉంచుతామని పేర్కొన్నారు.

గురువారం రాత్రి 7 గంటల సమయంలో దిల్లీ సచివాలయంలో రేఖా గుప్తా అధ్యక్షతన తొలి మంత్రివర్గ భేటీ జరిగింది. సమావేశం అనంతరం మంత్రులందరితో కలిసి యమునా ఘాట్ వద్దకు వెళ్లి ప్రత్యేక పూజలు నిర్వహించారు.

నిన్న రామ్‌లీలా మైదానంలో భారీ భద్రతా ఏర్పాట్ల మధ్య జరిగిన వైభవోత్సవ కార్యక్రమంలో రేఖా గుప్తా దిల్లీ 9వ ముఖ్యమంత్రిగా ప్రమాణ స్వీకారం చేసిన విషయం తెలిసిందే. ప్రమాణ కార్యక్రమం అనంతరం ఆమె వెంటనే సచివాలయానికి వెళ్లి అధికారిక బాధ్యతలు చేపట్టారు.

ప్రభుత్వ హామీల అమలుపై ఎలాంటి ఆలస్యం చేయకుండా ముందుకు సాగుతామని, దిల్లీ అభివృద్ధి కోసం ప్రతి క్షణం శ్రమిస్తామని సీఎం రేఖా గుప్తా స్పష్టం చేశారు.