అమరావతి: మన తెలుగు పుత్రుడు 18ఏళ్లకే చెస్‌ ప్రపంచ ఛాంపియన్‌
భారతీయ చెస్‌ చరిత్రలో ఓ అపూర్వ ఘట్టం ఆవిష్కృతమైంది. తన జీవితాంతం తపనగా ఉన్న లక్ష్యాన్ని చేరుకుని, చెస్‌ ప్రపంచానికే కింగ్‌గా నిలిచిన తెలుగుదనపు సగర్వ ప్రాతినిధ్యం దొమ్మరాజు గుకేశ్‌. 18 ఏళ్ల వయసులోనే సాధించిన ఈ ఘనత అతడి అంకితభావానికి, దీక్షకు నిలువెత్తు సాక్ష్యం.
గుకేశ్‌ సాధించిన అద్భుతం
పొడవైన ప్రయాణంలో ఎన్నో ఆటుపోట్లు, నిరంతర శ్రమ, త్యాగాలు చేసిన గుకేశ్‌ చివరకు తన స్వప్నాన్ని నిజం చేశాడు. ప్రపంచ చెస్‌ ఛాంపియన్‌షిప్‌లో అనుభవజ్ఞుడు, డిఫెండింగ్‌ ఛాంపియన్‌ డింగ్‌ లిరెన్‌ను ఓడించి 14వ రౌండ్‌ విజేతగా నిలిచాడు. మొత్తంగా 7.5 పాయింట్లు సాధించిన గుకేశ్‌ చెస్‌ ప్రపంచాన్ని తనదైన శైలిలో ఆశ్చర్యపరిచాడు.
తల్లిదండ్రుల త్యాగం, గుకేశ్‌ అంకితభావం
ఆ ఆటలో విజయానికి వెనుక ఉన్న తల్లిదండ్రుల త్యాగాలు, తన నిరంతర శ్రమ.. ఇవి గుకేశ్‌ను ఈ స్థాయికి చేర్చాయి. సాధారణంగా భావోద్వేగాలను బయటకు వ్యక్తపరిచని గుకేశ్‌ ఆ విజయక్షణంలో కన్నీరు పెట్టుకున్నాడు. తనకు అండగా ఉన్న కోట్ల మంది భారతీయుల ఆశలు నెరవేరించానన్న ఆలోచన అతడిలో అపారమైన ఆనందాన్ని నింపింది.
పిన్నవయసు ప్రతిభ, ప్రపంచ ఘనత
తన వయసు ఇంకా 18 ఏళ్లు మాత్రమే అయినప్పటికీ గుకేశ్‌ సాధించిన ఘనత ఎంతో మంది వయసుదాటి ఆటగాళ్లకు కూడా సాధ్యం కాలేనిది. సగటు టీనేజర్‌ జీవితానికి భిన్నంగా, పాఠశాల దశ నుంచే గుకేశ్‌ తన దృష్టిని చెస్‌ పట్ల మరల్చాడు. కొన్ని వేల గంటల సాధన, అకుంఠిత దీక్షతో ప్రపంచ చదరంగ ఛాంపియన్‌గా అవతరించి ప్రపంచమంతా తన ప్రతిభను సత్యపరిచాడు.
ప్రజల గర్వకారణం
గుకేశ్‌ విజయానికి భారత చెస్‌ అభిమానులు హర్షధ్వానాలు పలుకుతున్నారు. దేశం గర్వపడే విధంగా అతడు అందించిన ఈ అద్భుత ప్రదర్శన ప్రతి యువకుడి జీవితంలో ప్రేరణగా నిలుస్తుంది.
ఇది చారిత్రకం, అసాధారణం. అద్భుతమైన ఘనత సాధించిన గుకేశ్‌కు అభినందనలు. అతని అసామాన్య ప్రతిభ, కష్టం, అంకితభావానికి ఫలితమిది. ఈ విజయంతో అతని పేరు చదరంగం చరిత్రలో చేరడమే కాకుండా.. పెద్ద కలలు కనేలా కోట్లాది మంది యువతకు స్ఫూర్తిగా నిలిచాడు. – ప్రధానమంత్రి నరేంద్ర మోదీ
ప్రపంచ చెస్‌ ఛాంపియన్‌షిప్‌ గెలిచిన అతిపిన్న వయస్సు ఆటగాడిగా నిలిచిన గుకేశ్‌కు అభినందనలు. అతని దేశం గర్వపడేలా చేశాడు. ఈ విజయం చెస్‌లో శక్తిమంతమైన దేశంగా భారత ముద్రను చాటింది. – రాష్ట్రపతి ద్రౌపదీ ముర్ము
అతిపిన్న వయసులో ప్రపంచ చెస్‌ ఛాంపియన్‌షిప్‌ సొంతం చేసుకోవడం ద్వారా దొమ్మరాజు గుకేశ్‌ చరిత్ర సృష్టించారు. ఆయన తెలుగువాడు కావడం గర్వకారణం. 18 ఏళ్ల వయసులో ఈ ఘనత సాధించిన తొలివ్యక్తిగా గుకేశ్‌ నిలిచారు. అతడి ఘనతను యావత్తు దేశం ఆస్వాదిస్తోంది. భవిష్యత్తులో ఇలాంటి విజయాలు మరిన్ని అందుకోవాలి. – ముఖ్యమంత్రి చంద్రబాబు
పిన్న వయసులోనే దొమ్మరాజు గుకేశ్‌ ప్రపంచ చెస్‌ ఛాంపియన్‌షిప్‌ విజేతగా నిలవడంతో ప్రతి భారతీయుడు గర్విస్తున్నాడని గవర్నర్‌ జస్టిస్‌ ఎస్‌.అబ్దుల్‌ నజీర్‌ పేర్కొన్నారు. ఈ ఘనత సాధించిన రెండో భారత గ్రాండ్‌ మాస్టర్‌ గుకేశ్‌ అని అభినందించారు. – గవర్నర్‌ జస్టిస్‌ అబ్దుల్‌ నజీర్‌
ప్రపంచ చెస్‌ ఛాంపియన్‌గా నిలిచిన గుకేశ్‌ దొమ్మరాజు యువతకు స్ఫూర్తి అని ఉపముఖ్యమంత్రి పవన్ కల్యాణ్‌ అన్నారు. గుకేశ్‌కు అభినందనలు తెలుపుతూ పిన్న వయసులో ఈ చరిత్ర సృష్టించడం భారతీయులందరికీ గర్వకారణమని పేర్కొన్నారు. గుకేశ్‌ తమిళనాడులోని తెలుగు కుటుంబానికి చెందిన వారు కావడం మరింత ఆనందాన్ని కలిగిస్తోందన్నారు. – ఉపముఖ్యమంత్రి పవన్ కల్యాణ్‌
ప్రపంచ చెస్‌ ఛాంపియన్‌షిప్‌ సొంతం చేసుకొని ఈ ఘనత సాధించిన రెండో భారతీయుడిగా గుకేశ్‌ రికార్డు నెలకొల్పాడని విద్య, ఐటీ శాఖల మంత్రి నారా లోకేశ్‌ కొనియాడారు. దేశానికి అతడు గర్వకారణమని ఎక్స్‌ వేదికగా పేర్కొన్నారు. భవిష్యత్తులో గుకేశ్‌ మరిన్ని విజయాలు సొంతం చేసుకోవాలని ఆకాక్షించారు. – మంత్రి లోకేశ్‌
ప్రపంచ చెస్‌ ఛాంపియన్‌షిప్‌ను 18 ఏళ్ల వయసులో గెలిచి దొమ్మరాజు గుకేశ్‌ చరిత్ర సృష్టించారని మాజీ ముఖ్యమంత్రి జగన్‌ పేర్కొన్నారు. గుకేశ్‌ తెలుగు రాష్ట్రానికి చెందినవాడవడం మనందరికీ గర్వకారణమన్నారు. భవిష్యత్తులోనూ అనేక విజయాలను అందుకోవాలంటూ ఎక్స్‌లో అభినందనలు తెలిపారు. – మాజీ సీఎం జగన్‌