మహారాష్ట్ర: అసెంబ్లీ ఎన్నికల్లో ఎన్డీఏ కూటమి ఘనవిజయం సాధించడంలో జనసేన అధినేత పవన్ కళ్యాణ్ కీలక పాత్ర పోషించారు. సోలాపూర్, పుణే వంటి ప్రాంతాల్లో నిర్వహించిన పవన్ ర్యాలీలు, రోడ్ షోలు స్థానిక ప్రజలను ఆకట్టుకోవడమే కాక, బీజేపీ అభ్యర్థులకు విజయావకాశాలను మరింత పెంచాయి.
తాజాగా సోలాపూర్ నుంచి గెలిచిన బీజేపీ ఎమ్మెల్యే దేవేంద్ర రాజేష్ కోతే పవన్ మద్దతును ప్రశంసించారు. “పవన్ గారి ప్రచారం నా విజయానికి పెద్ద దారి చూపించింది.
ఆయన ప్రసంగాలు ప్రజల హృదయాలను తాకాయి. నేను గెలిచిన ప్రతిసారీ, ఇది పవన్ గారి మద్దతు వల్ల సాధ్యమైంది” అని దేవేంద్ర పేర్కొన్నారు.
పవన్ కళ్యాణ్ మహారాష్ట్రలోని ర్యాలీల్లో భిన్నమైన ప్రసంగ శైలి, ఆయనకు ఉన్న ప్రత్యేకమైన అభిమాన స్థాయితో ఆ ప్రాంత ప్రజలను ఆకర్షించగలిగారు.
ఇది తెలుగునాట ఆయనకు ఉన్న ప్రజాదరణ మహారాష్ట్ర ప్రజలను ప్రభావితం చేయడంలో సహాయపడిందని రాజకీయ విశ్లేషకులు అభిప్రాయపడ్డారు.
ఈ విజయం పవన్ కళ్యాణ్ కు జాతీయ స్థాయిలో గుర్తింపును తెస్తుందని, ఆయనకు ఇతర రాష్ట్రాల్లో మరింత పాపులారిటీ సాధించే అవకాశం కల్పిస్తుందని రాజకీయ పండితులు అభిప్రాయపడుతున్నారు.
మహారాష్ట్రలో జరిగిన పవన్ ప్రచారం, అక్కడి విజయవంతమైన ఎన్డీఏ ఫలితాలు తెలుగు రాష్ట్రాల్లోనూ చర్చనీయాంశమవుతున్నాయి.