అమరావతి: స్మగ్లర్లను హీరోలుగా చూపుతున్నారు – పవన్ కల్యాణ్ ఆసక్తికర వ్యాఖ్యలు!
జనసేన అధినేత మరియు ఏపీ డిప్యూటీ సీఎం పవన్ కల్యాణ్ ఇటీవల కర్ణాటక పర్యటనలో చేసిన వ్యాఖ్యలు, సినిమా రంగంలో మారుతున్న కథాంశాలపై ఆసక్తికర చర్చలకు కారణమయ్యాయి.
కర్ణాటకలో పర్యటించిన పవన్, 40 ఏళ్ల క్రితం సినిమాలో హీరోలు అడవులను కాపాడే పాత్రలు పోషించేవారని, కానీ ఇప్పటి రోజుల్లో, హీరోలను స్మగ్లర్లుగా చూపిస్తూ, అడవులను నరికే పాత్రల్లో చూపించడం ద్వారా సమాజంలో విపరీతమైన మార్పులు చోటుచేసుకుంటున్నాయని పవన్ కల్యాణ్ అభిప్రాయపడ్డారు.
సినిమా రంగానికి చెందినవాడిగా ఇలాంటి పాత్రల్లో నటించడం తనకు చాలా ఇబ్బందిగా ఉంటుందని పవన్ తెలిపారు.
గురువారం కర్ణాటక పర్యటనలో ఉన్న పవన్ కల్యాణ్, ఆ రాష్ట్ర సీఎం సిద్ధరామయ్యతో భేటీ అయ్యారు. వన్యప్రాణి సంరక్షణ, అటవీ పరిరక్షణ అంశాలపై ఇద్దరి మధ్య చర్చ జరిగింది.
ముఖ్యంగా ఎర్రచందనం అక్రమ రవాణాను నివారించడానికి తీసుకోవాల్సిన చర్యలపై పవన్ ప్రత్యేకంగా చర్చించారు.
అలాగే, ఏనుగుల గుంపులు రైతుల పొలాలను ధ్వంసం చేస్తున్న అంశం కూడా వారి మధ్య చర్చకు వచ్చింది.
ఈ సమస్యను పరిష్కరించడానికి, కర్ణాటక నుంచి ఆరు కుంకీ ఏనుగులను ఆంధ్రప్రదేశ్‌కి ఇవ్వాలని పవన్ కోరారు. కుంకీ ఏనుగులు అనేవి ఆదేశాలకు అనుకూలంగా కదలే శిక్షణ పొందిన ఏనుగులు.