మూవీడెస్క్: ప్రశాంత్ వర్మ దర్శకత్వంలో యంగ్ హీరో తేజ సజ్జా నటించిన హనుమాన్ సినిమా భారీ విజయాన్ని అందుకున్న విషయం తెలిసిందే.
చిన్న సినిమా అయినా కూడా భారీ రికార్డులను సృష్టించింది. ఈ విజయం తర్వాత సీక్వెల్‌గా జై హనుమాన్ అనౌన్స్ చేయడంతో అంచనాలను మరింత పెంచింది.
అందరికీ ఆసక్తిని రేకెత్తిస్తూ, దర్శకుడు ప్రశాంత్ వర్మ ఆ మధ్య విడుదల చేసిన ఒక గ్లింప్స్ కూడా వైరల్ అయింది.
అందమైన ప్రకృతి సౌందర్యం మధ్యలో నది, కొండలు చూపిస్తూ, అంజనాద్రి 2.0 అని పేర్కొంటూ “జై హనుమాన్” హ్యాష్ ట్యాగ్‌తో విడుదల చేసిన ఈ వీడియో చాలా మంది అభిమానులను ఆకట్టుకుంది.
ఇప్పటికే జనవరిలో జై హనుమాన్ ప్రీ ప్రొడక్షన్ పనులు ప్రారంభం కాగా, ఈ ప్రాజెక్టు షూటింగ్ త్వరలో ప్రారంభమవుతుందని వార్తలు వస్తున్నాయి.
ఈ సీక్వెల్ 2025 సంక్రాంతికి విడుదల కావాల్సి ఉన్నప్పటికీ, తాజా సమాచారం ప్రకారం 2026లో ప్రేక్షకుల ముందుకు వచ్చే అవకాశం ఉందని తెలుస్తోంది.
అయితే సీక్వెల్ బడ్జెట్ చాలా పెరిగిందనే కారణంగా మొదటి భాగాన్ని నిర్మించిన నిరంజన్ రెడ్డి ఈ ప్రాజెక్టు నుంచి తప్పుకున్నారని ఊహాగానాలు ఉన్నాయి.
ఈ వార్తలు సోషల్ మీడియాలో వైరల్ అవుతున్నాయి. ఇప్పుడు జై హనుమాన్ ను మైత్రీ మూవీ మేకర్స్ నిర్మిస్తారనే ప్రచారం జోరుగా నడుస్తోంది. కానీ ఈ వార్తలు నిజమో కాదో ఇంకా తెలియాల్సి ఉంది.