మూవీడెస్క్: అల్లు అర్జున్, సుకుమార్ కాంబినేషన్ లో వస్తున్న పుష్ప 2 సినిమాపై ఆడియెన్స్ లో భారీ అంచనాలు ఉన్నాయి.
ఈ ఏడాది ఆగస్టు 15 న విడుదల కావాల్సిన ఈ సినిమా, కొన్ని కారణాలతో డిసెంబర్ 6కి వాయిదా పడింది.
దర్శకుడు సుకుమార్, సినిమాపై ఎలాంటి కాంప్రమైజ్ చేయకుండా, ప్రతీ దృశ్యాన్ని అత్యుత్తమంగా రూపొందించాలని నిర్ణయించుకున్నట్లు తెలుస్తోంది.
అయితే, ఈ సినిమా డిసెంబర్ 6కి విడుదల అవుతుందా లేదా అనే అనుమానాలు కూడా పుట్టుకొస్తున్నాయి.
సుకుమార్ సాధారణంగా తన సినిమాలను పూర్తి చేయడంలో ఆలస్యం చేస్తారని టాక్ వినిపిస్తుండటంతో, పుష్ప 2 2025కి వాయిదా పడుతుందని గాసిప్స్ పుట్టుకొచ్చాయి.
ఈ ఊహాగానాలపై మైత్రి మూవీ మేకర్స్ నిర్మాత రవిశంకర్ స్పష్టత ఇచ్చారు. ఆయన మాట్లాడుతూ, డిసెంబర్ 6 న పుష్ప 2ను ఖచ్చితంగా విడుదల చేస్తామని తెలిపారు.
అంతేకాకుండా, డిసెంబర్ 5న ప్రత్యేక ప్రీమియర్లు కూడా ఉంటాయని చెప్పారు. సెప్టెంబర్ 2 నాటికి మొదటి భాగం ఎడిటింగ్ పూర్తి చేస్తారని, అక్టోబర్ 6 లోపు రెండవ భాగం కూడా పూర్తవుతుందని వివరించారు.
ప్రస్తుతం రామోజీ ఫిల్మ్ సిటీలో క్లైమాక్స్ సన్నివేశాలు చిత్రీకరిస్తున్నారని, ఇంకా రెండు పాటలు మాత్రమే మిగిలి ఉన్నాయని నిర్మాత తెలిపారు.
ఈ రెండు పాటలలో ఒకటి అక్టోబర్‌లో, మరొకటి నవంబర్‌లో చిత్రీకరించి విడుదల చేస్తామని చెప్పారు.