తిరుపతి: తొక్కిసలాట ఘటనలో టీటీడీ విజిలెన్స్ అధికారుల నిర్లక్ష్యమే కారణమని వైసీపీ నేత రోజా తీవ్ర విమర్శలు చేశారు. ఈ ఘటన కూటమి ప్రభుత్వ అసమర్థతకు నిదర్శనమని ఆమె ఆరోపించారు.
చంద్రబాబు అధికారంలో ఉన్నప్పుడు ఇలాంటి చావులు జరుగుతాయని విమర్శించారు. గతంలో గోదావరి పుష్కరాల్లో జరిగిన తొక్కిసలాటకు చంద్రబాబు బాధ్యత వహించాల్సి ఉన్నప్పటికీ, ఇప్పుడు తిరుపతిలో కూడా అదే పరిస్థితి తిరగదోసినట్టు పేర్కొన్నారు.
సంధ్య థియేటర్ ఘటనలో అల్లు అర్జున్‌ను కేసులో ఇరికించారని, తిరుపతి ఘటనలో చంద్రబాబు, టీటీడీ ఛైర్మన్, జిల్లా ఎస్పీలపై కేసులు నమోదు చేయాలని రోజా డిమాండ్ చేశారు.
ఈ చావులను ప్రభుత్వం చేసిన హత్యలుగా ఆమె మాట్లాడారు. అదే విధంగా, సనాతన యోధుడిగా భావించే డిప్యూటీ సీఎం పవన్ కల్యాణ్ ఎందుకు స్పందించడం లేదని ప్రశ్నించారు.
హైందవ శంఖారావం నిర్వాహకులు ఎక్కడున్నారని, పీఠాధిపతులు ఎందుకు స్పందించకపోతున్నారని రోజా నిలదీశారు. భవిష్యత్తులో ఇలాంటి ఘటనలు పునరావృతం కాకుండా కఠిన చర్యలు తీసుకోవాలని రోజా డిమాండ్ చేశారు.