ఢిల్లీ: సబర్మతి ఆశ్రమాన్ని ఆధునికీకరించాలనే గుజరాత్ ప్రభుత్వ యోజనపై దాఖలైన పిటిషన్‌ను సుప్రీంకోర్టు కొట్టివేసింది. మహాత్మా గాంధీ మునిమనవడు తుషార్ గాంధీ వేసిన ఈ పిటిషన్‌లో ఆశ్రమ విశిష్టత దెబ్బతింటుందని ఆయన అభిప్రాయపడ్డారు. అయితే ధర్మాసనం ఈ వాదనలను తిరస్కరించింది.
ఈ పిటిషన్‌పై విచారణ చేసిన సుప్రీంకోర్టు ధర్మాసనం “ప్రాజెక్టును నిలిపివేయడానికి తగిన ఆధారాలు లేవు” అని స్పష్టం చేసింది. తుషార్ వ్యక్తిగత భావోద్వేగాలతో కాకుండా అభివృద్ధి దృష్టితో విషయాన్ని చూడాలని సూచించింది.
గుజరాత్‌లోని సబర్మతి ఆశ్రమాన్ని రూ.1200 కోట్లతో అభివృద్ధి చేయాలన్న ప్రణాళికకు గుజరాత్ హైకోర్టు గతంలోనే మద్దతు తెలిపింది. దీనిని సవాల్ చేస్తూ తుషార్ గాంధీ సుప్రీంకోర్టును ఆశ్రయించారు.
కోర్టు తుది ఆదేశాల్లో, “దేశం అభివృద్ధి దిశగా సాగుతుంది. భావోద్వేగాలకు బదులుగా ప్రజల అవసరాలను పరిగణనలోకి తీసుకోవాలి” అని పేర్కొంది. తాము అన్ని అంశాలు పరిశీలించిన తర్వాతే నిర్ణయం తీసుకున్నామని కోర్టు స్పష్టం చేసింది.