విక్టరీ వెంకటేశ్, అనిల్ రావిపూడి కాంబినేషన్‌లో వచ్చిన సంక్రాంతికి వస్తున్నాం సినిమా థియేటర్లలో ఘనవిజయం సాధించిన సంగతి తెలిసిందే. ఫ్యామిలీ ఆడియెన్స్‌ను బాగా ఆకట్టుకున్న ఈ సినిమా, తాజాగా బుల్లితెరపై కూడా అదరగొట్టింది. జీ తెలుగు ఛానెల్‌లో వరల్డ్ టెలివిజన్ ప్రీమియర్‌గా ప్రసారమైన ఈ సినిమా రికార్డు స్థాయిలో TRP సాధించింది.
SD ఛానెల్‌లో 15.92, HD ఛానెల్‌లో 2.3 TRP నమోదు కావడంతో, మొత్తం 18.22 రేటింగ్ సాధించింది. ఓటీటీలో విడుదలైనప్పటికీ, టీవీలో ఇంత భారీ రేటింగ్ రావడం అనిల్ రావిపూడి మార్క్ మేకింగ్‌కు నిదర్శనం. వెంకటేశ్ కామెడీ టైమింగ్, ఫ్యామిలీ ఎమోషన్స్, మాస్ ఎలిమెంట్స్ సినిమాను మరింత ప్రత్యేకంగా నిలిపాయి.
గతంలో F2, F3 సినిమాలు కూడా బుల్లితెరపై మంచి TRP సాధించగా, ఇప్పుడు సంక్రాంతికి వస్తున్నాం కూడా అదే జాబితాలో చేరింది. మంచి కథ, వినోదం కలిసొచ్చినప్పుడు టీవీలోనూ భారీ రేటింగ్ సాధించొచ్చని మరోసారి నిరూపితమైంది.
ఈ విజయం వల్ల వెంకటేశ్, అనిల్ రావిపూడి కాంబోకు బుల్లితెర మార్కెట్‌లో మరింత క్రేజ్ పెరిగింది. ఇక భవిష్యత్తులో కుటుంబ కథా చిత్రాలకు మరింత డిమాండ్ పెరుగుతుందని ట్రేడ్ వర్గాలు భావిస్తున్నాయి.