న్యూఢిల్లీ: కరోనా వైరస్ విజృంభన నేపథ్యంలో విధించిన లాక్‌డౌన్‌ను కేంద్ర ప్రభుత్వం నెమ్మది నెమ్మదిగా అన్‌లాక్‌ చేస్తూ వస్తోంది. కాగా వచ్చే వారంలో అన్‌లాక్‌ 4.0 ప్రక్రియ మొదలు అవనుంది. తాజాగా ఈ విషయానికి సంబంధించి కేంద్ర ఆరోగ్య శాఖ కార్యదర్శి వివరణ ఇచ్చారు. కేంద్ర హోంశాఖ ప్రకటించబోయే సడలింపులలో స్కూళ్లు తెరవడం ఉండబోదని వెల్లడించారు. రోజు రోజుకు కరోనా కేసులు పెరుగుతున్న ఈ క్రమంలో కేంద్ర ప్రభుత్వానికి పాఠశాలలు తెరిచే ఆలోచన ఇప్పట్లో లేదని స్పష్టం చేశారు.
అయితే అన్ లాక్ 4.0 లో మెట్రో రైళ్లకు అనుమతి ఇవ్వాలని కేంద్ర హోంశాఖ భావిస్తున్నట్లు సమాచారం. చాలా రాష్ట్రాల నుంచి మెట్రో సేవలపై డిమాండ్లు పెరుగుతున్న నేపథ్యంలో హోంశాఖ ఈ నిర్ణయం తీసుకోబోతున్నట్లు తెలుస్తోంది. ఇప్పటికే దేశీయ విమాన సర్వీసులు, బస్సులు తిరుగుతున్న సంగతి తెలిసిందే.
ఇదిలా ఉండగా సినిమా థియేటర్లు, బార్లు తెరవడానికి మరికొంత సమయం పట్టే అవకాశం ఉన్నట్లు తెలుస్తోంది. అయితే కంటైన్‌మెంట్‌ జోన్లలలో ఆంక్షలు యధావిధిగా కొనసాగనున్నాయి. అన్‌లాక్‌ 4.0లో ఆంక్షలు వేటిపై ఉంటాయన్న దానిని మాత్రమే కేంద్ర హోం శాఖ తన ప్రకటన లో వివరించింది.