జైపూర్‌: సెప్టెంబర్ లో జరగనున్న ఐపీఎల్‌ 2021 రెండవ్ ఫేజ్‌ కు ఇప్పటికే రాజస్థాన్ రాయల్స్ స్టార్‌ ఆటగాళ్ళైన జోస్ బట్లర్, జోఫ్రా ఆర్చర్, బెన్ స్టోక్స్, ఆండ్రూ టై దూరమయ్యారు. కాగా ఆస్ట్రేలియా క్రికెటర్ ఆండ్రూ టై స్థానంలో సెన్సేషనల్ టీ 20 నెం.1 బౌలర్ అయిన సౌతాఫ్రికా స్పిన్నర్ తబ్రాజ్ షమ్సీ రాజస్థాన్ రాయల్స్ జట్టులోకి రానున్నాడు.
యూఏఈలో జరగనున్న ఐపీఎల్‌ 2021 సీజన్ మిగిలిన మ్యాచ్‌లకు తబ్రాజ్ షమ్సీ తో ఒప్పందం కుదర్చుకున్నట్లు రాజస్థాన్ రాయల్స్ బుధవారం తెలిపింది. దక్షిణాఫ్రికా తరఫున తబ్రాజ్ షమ్సీ 2017 లో ఇంగ్లాండ్‌తో జరిగిన ద్వైపాక్షిక టీ 20 సిరీస్‌లో ఇంటర్నేషనల్ కెరీర్ మొదలుపెట్టాడు.
తబ్రాజ్ తన టీ20 కెరీర్ లో 39 మ్యాచుల్లో 45 వికెట్లు పడగొట్టి ఐసీసీ ర్యాంకింగ్స్‌లో నెం.1 బౌలర్‌గా నిలిచాడు. 2016 సీజన్లలో రాయల్ ఛాలెంజర్స్ బెంగళూరు తరుపున ఆడిన తబ్రాజ్ షమ్సీ కేవలం 3 వికెట్లు మాత్రమే పడగొట్టాడు. కాగా ఇప్పటికే వ్యక్తిగత కారణాలతో ఐపీఎల్‌కి దూరమైన జోస్ బట్లర్ స్దానంలో న్యూజిలాండ్ వికెట్ కీపర్ బ్యాట్స్‌మెన్‌ గ్లెన్ ఫిలిప్స్‌ను రాజస్థాన్ రాయల్స్ తీసుకుంది.