జాతీయం: సోషల్ మీడియా నెగటివిటీపై తమన్‌ ఆవేదన.. చిరంజీవి స్పందన
సినిమా పరిశ్రమలో నెగటివ్ ట్రోలింగ్, ట్రెండ్స్ పై సంగీత దర్శకుడు తమన్‌ చేసిన వ్యాఖ్యలు వైరల్‌గా మారాయి. ‘డాకు మహారాజ్‌‘ సక్సెస్‌ మీట్‌లో తన మనసులోని బాధను వ్యక్తపరిచిన తమన్‌ వ్యాఖ్యలు చిత్రసీమలో చర్చనీయాంశమయ్యాయి. ఈ వ్యాఖ్యలపై మెగాస్టార్‌ చిరంజీవి ఎక్స్ వేదికగా స్పందించి తమన్‌కు మద్దతుగా నిలిచారు.
తమన్‌ ఆవేదన
తమన్‌ మాట్లాడుతూ, “సక్సెస్‌ చాలా విలువైనది. జీవితంలో ముందుకు సాగేందుకు అది అవసరం. కానీ నేడు నెగటివ్ ట్రోల్స్‌ సినిమాలను తీవ్రంగా ప్రభావితం చేస్తున్నాయి. నిర్మాతలు తమ జీవితాన్ని, డబ్బును ధారపోసి సినిమా తీస్తున్నారు. కానీ, నెగెటివ్ ట్రెండ్స్ వల్ల వారి శ్రమ వృథా అవుతోంది. తెలుగు సినిమా ప్రతిష్ట పెరుగుతుండగా, మనమే మన సినిమాను చంపేలా ప్రవర్తించడం బాధాకరం. వ్యక్తిగతంగా విమర్శించండి, కానీ సినిమాను మాత్రం నాశనం చేయకండి” అని వేదనతో తెలిపారు.
చిరంజీవి సమాధానం
తమన్‌ వ్యాఖ్యలపై చిరంజీవి స్పందిస్తూ, “తమన్‌.. నిన్ను నీవు వ్యక్తపరిచిన విధానం గుండెకు తాకింది. నెగటివిటీ ప్రభావం ఎంత తీవ్రంగా ఉంటుందో నువ్వు చెప్పిన విధానం అర్థమవుతోంది. ప్రతి ఒక్కరూ తమ మాటల ప్రాముఖ్యతను గుర్తించి, అవి ఎలా ప్రభావితం చేస్తాయో ఆలోచించాలి. పాజిటివ్‌ దృక్పథం మన జీవితాలను కూడా మారుస్తుంది” అంటూ చిరంజీవి తమన్‌కు ధైర్యం ఇచ్చారు.
తమన్‌ కృతజ్ఞతలు
చిరంజీవి వ్యాఖ్యలపై తమన్‌ స్పందిస్తూ, “మీ మాటలు భగవద్గీత శ్లోకాన్ని గుర్తు చేశాయి. కొన్నిసార్లు మనసులోని ఆవేదన బయటకు వస్తుంది. మీ మద్దతు నాకు ఎంతో శక్తినిచ్చింది” అంటూ చిరంజీవికి కృతజ్ఞతలు తెలిపారు.