పచ్చ రంగు పులుముకుంటున్న తుంగభద్ర జలాలు..
కంప్లి (కర్ణాటక): ఆంధ్ర, కర్ణాటక, తెలంగాణ రాష్ట్రాల కోసం జీవనాడిగా నిలిచిన తుంగభద్ర జలాశయం ఇప్పుడు కాలుష్యానికి గురవుతోంది. ఇటీవల ఈ జలాశయం నీరు పచ్చరంగు లోకి మారడం రైతులు, ప్రజలను తీవ్ర ఆందోళనకు గురిచేస్తోంది. ఖరీఫ్‌ కాలంలో తక్కువ వర్షపాతం కారణంగా ఇబ్బందులు ఎదుర్కొన్న రైతులు, ఇప్పుడు ఈ కాలుష్య నీటితో రబీ పంటలపై ప్రభావం పడుతుందేమోనని భయపడుతున్నారు.
కాలుష్యకారకాలు..
తుంగభద్ర జలాశయం నీటి కాలుష్యానికి ప్రధాన కారణం పైన ప్రాంతాల్లోని పరిశ్రమల వ్యర్థాలు అని గుర్తించారు. హరప్పనహళ్లి, హగరి బొమ్మనళ్లి వంటి ప్రాంతాల్లో కర్మాగారాలు వదిలే వ్యర్థ పదార్థాలు నేరుగా జలాశయంలోకి చేరుతుండటం వల్ల నీటి రంగు మారిందని రైతు సంఘ నాయకులు సింధిగేరి గోవిందప్ప తెలిపారు.
పాలకుల నిర్లక్ష్యం
జలాశయం నుంచి కొప్పాళ్‌, విజయనగర, బళ్లారి, రాయచూరు జిల్లాలకు తాగునీరు సరఫరా అవుతోంది. కలుషిత నీటి వల్ల అనారోగ్య సమస్యలు తలెత్తే అవకాశముందని ప్రజలు ఆందోళన వ్యక్తం చేస్తున్నారు. నీటి వినియోగంలో రైతులు మాత్రమే కాకుండా సామాన్య ప్రజలు కూడా ఇబ్బందులు ఎదుర్కొంటున్నారు.
వేసవిలో తాగునీటి సమస్య
వేసవి రాగానే తుంగభద్ర జలాశయ నీటి నిల్వ తక్కువ అవుతుందని, తాగునీటికి తీవ్ర ఇబ్బందులు తలెత్తుతాయని కర్ణాటక, ఆంధ్ర, తెలంగాణ రాష్ట్రాల ప్రజలు ఆందోళన చెందుతున్నారు. కాలుష్యం ఈ సమస్యను మరింత ఉద్ధృతం చేస్తుందనే అభిప్రాయం వ్యక్తమవుతోంది.
రైతుల ఆందోళన
కాలుష్య సమస్యను అదుపు చేసేందుకు తగిన చర్యలు తీసుకోవాలని రైతులు డిమాండ్‌ చేస్తున్నారు. కాలుష్యానికి కారణమైన పరిశ్రమలపై చర్యలు తీసుకోవాలని, లేదా తుంగభద్ర జలాశయం ఎదుట నిరసనలు నిర్వహిస్తామని రైతు సంఘాలు హెచ్చరించాయి. నీటి శుద్ధికి తక్షణ చర్యలు చేపట్టాలని వారు అధికారులను కోరారు.
పాలకుల స్పందన అవసరం
తుంగభద్ర నీటి నాణ్యతను పరిరక్షించేందుకు ప్రభుత్వం తక్షణ చర్యలు చేపట్టాలని, పరిశ్రమల వ్యర్థాల నిల్వకు సాంకేతిక పరిష్కారాలు అమలు చేయాలని ప్రజలు, రైతు సంఘాలు విజ్ఞప్తి చేశాయి. నీటి కాలుష్యం సమస్యను వేగంగా పరిష్కరించకపోతే ఇది ఆర్థిక, ఆరోగ్యపరంగా ముప్పును కలిగించవచ్చు.