మూవీడెస్క్: ఇటీవల ఇండియన్ ఫిల్మ్ ఇండస్ట్రీలో బాగా చర్చకు వచ్చిన పేరు డాన్ లీ.
ప్రభాస్, సందీప్ రెడ్డి వంగా కాంబినేషన్ లో తెరకెక్కనున్న భారీ బడ్జెట్ సినిమా ‘స్పిరిట్’ లో డాన్ లీ విలన్ పాత్రలో కనిపించబోతున్నట్లు టాక్ వినిపిస్తోంది.
తాజాగా డాన్ లీ తన ఇన్‌స్టాగ్రామ్‌లో ‘సలార్ 2’ ఫ్యాన్‌మేడ్ పోస్టర్ షేర్ చేయడంతో, ఆయన సలార్ సీక్వెల్‌లో కూడా భాగమయ్యే అవకాశం ఉందనే ఊహాగానాలు మొదలయ్యాయి.
డాన్ లీ అసలు పేరు లీ డాంగ్-సియోక్. దక్షిణ కొరియాలో జన్మించిన ఆయన 19 ఏళ్ల వయస్సులో అమెరికా వెళ్లి మార్షల్ ఆర్ట్స్ నేర్చుకున్నారు.
హాలీవుడ్ లో మార్వెల్ మూవీస్ సిరీస్ లో ఒక భాగంగా, 2021లో ‘ఎటర్నల్స్’ చిత్రంలో సూపర్ హీరోగా నటించారు.
ఆయన నటనకు అంతర్జాతీయ స్థాయిలో మంచి గుర్తింపు వచ్చింది. ‘ట్రైన్ టు బుసాన్’ చిత్రంతో గ్లోబల్ స్థాయిలో విశేష గుర్తింపు పొందారు.
‘స్పిరిట్’ సినిమాలో డాన్ లీ ఉన్నాడనే టాక్, సినిమా పై భారీ హైప్ క్రియేట్ చేస్తోంది.
నిజమైతే డాన్ లీ మరింత ఇంటర్నేషనల్ క్రేజ్ తెచ్చిపెడతారని, ‘స్పిరిట్’ ప్రభాస్ కెరీర్ లో మరో పెద్ద బ్లాక్‌బస్టర్ గా నిలుస్తుందని ట్రేడ్ వర్గాలు అంచనా వేస్తున్నాయి.