అమరావతి: చంద్రబాబు హామీల అమలు తీరుపై వైఎస్ షర్మిల తీవ్ర విమర్శలు చేసారు.
హామీల అమలులో నిర్లక్ష్యానికి విమర్శ
ఆంధ్రప్రదేశ్ ముఖ్యమంత్రి నారా చంద్రబాబు నాయుడుపై ఏపీ కాంగ్రెస్ అధ్యక్షురాలు వైఎస్ షర్మిల తీవ్ర విమర్శలు చేశారు. ఎన్నికల వేళ ప్రజలకు ఇచ్చిన హామీల అమలుపై చంద్రబాబు వెనక్కి తగ్గారని ఆరోపించారు. ‘‘ఏరు దాటే దాకా ఓడ మల్లన్న.. దాటాక బోడి మల్లన్న’’ సామెత ఆయన తీరుకు సరిగ్గా సరిపోతుందని వ్యాఖ్యానించారు.
ప్రత్యేక హోదా అతి ముఖ్యమని షర్మిల అభిప్రాయం
ఆంధ్రప్రదేశ్‌కు ప్రత్యేక హోదా అందించడం రాష్ట్రాభివృద్ధికి కీలకమని షర్మిల అన్నారు. ‘‘హోదాతోనే రాష్ట్రానికి నిధులు లభిస్తాయి, పరిశ్రమలు వస్తాయి, యువతకు ఉద్యోగావకాశాలు పెరుగుతాయి. ఇది రాష్ట్రానికి సంజీవనిలాంటిది’’ అని ఆమె పేర్కొన్నారు.
ఎన్నికల హామీల వెనుక…
చంద్రబాబు ఎన్నికలలో ‘‘సూపర్ సిక్స్’’ హామీలను ప్రచారం చేసుకున్నా, వాటి అమలుకు తగిన ఆర్థిక వనరులు అవసరం అవుతాయని ముందే తెలుసు కదా? అని షర్మిల ప్రశ్నించారు. ‘‘రాష్ట్రం రూ.10 లక్షల కోట్ల అప్పుల్లో ఉందని, సూపర్ సిక్స్ అమలుకు ప్రతి ఏటా రూ.2 లక్షల కోట్లు అవసరం అవుతుందని ముందే తెలియదా?’’ అని ఆమె ఘాటుగా ప్రశ్నించారు.
కేంద్రం పై ప్రశ్నల దాడి
కేంద్రానికి మద్దతు ఇచ్చినప్పటికీ, రాష్ట్ర అభివృద్ధికి అవసరమైన సహాయం అందలేదని షర్మిల మండిపడ్డారు. ‘రాష్ట్రానికి సహాయ పడనప్పుడు మోదీతో చెట్టాపట్టాలు దేనికోసం? రాష్ట్ర ప్రయోజనాలను ఎందుకు పణంగా పెట్టారు?’’ అంటూ ప్రశ్నల వర్షం కురిపించారు.
చంద్రబాబు పాలనపై ఆగ్రహం
‘‘హామీలను తుంగలో తొక్కి, విజన్ పేరుతో కాలయాపన చేసే విధానం సరైంది కాదు’’ అని షర్మిల వ్యాఖ్యానించారు. రాష్ట్ర అభివృద్ధి ప్రణాళికలు సక్రమంగా అమలవ్వాలని, ప్రత్యేక హోదా సాధించడంలో ప్రభుత్వం నిర్లక్ష్యంగా వ్యవహరించడంపై ఆమె ఆగ్రహం వ్యక్తం చేశారు.